اسلام آباد: وزيراعظم عمران خان ملڪ جي معيشت ۽ وڌندڙ مهانگائي تي اڄ اهم اجلاس طلب ڪري ورتو آهي.
ذريعن موجب اجلاس ۾ ملڪ جي معاشي صورتحال جو جائزو ورتو ويندو. عوامي پريشانين جي تدارڪ لاءِ حڪمت عملي تي مشورا ڪيا ويندا. وزيرن کي صوبائي ۽ ضلعي انتظاميه سان ملي قدمن جي حوالي سان هدايتون ڏنيون وينديون.
اجلاس ۾ عوام کي ريليف ڏيڻ جي لاءِ قدمن تي اهم فيصلن جا امڪان آهن. ذريعن ٻڌايو آهي ته وزيراعظم طرفان ملڪ ۾ وڌندڙ مهانگائي ۽ عوامي رد عمل کان پوءِ مهانگائي ڪنٽرول ڪرڻ جي لاءِ هڪ روڊ ميپ تيار ڪيو ويو آهي جنهن کي لاڳاپيل اختيارين کي بريف ڪيو ويندو.
اجلاس ۾ وفاقي وزير، صلاحڪار ۽ اهم عهديدار شرڪت ڪندا. وزيراعظم وزيرن کي مهانگائي جي خلاف قدم کڻڻ جي لاءِ تجويزون ڏيڻ جي هدايت ڪندو. واضح رهي ته سموري ملڪ ۾ پيٽروليم شين جي قيمتن ۾ وڏي واڌ کان پوءِ عوام ۽ اپوزيشن طرفان سخت رد عمل سامهون آيو آهي ان کان اڳ بجلي جي قيمتن ۾ به اضافو ڪيو ويو هو.
ٻئي طرف پاڪستاني ڪرنسي ڊالر جي مقابلي ۾ لاڳيتو دٻاءُ جو شڪار آهي. ڊالر جي قيمت به تاريخ بلند ترين سطح 173 روپين تي پهچي وئي آهي.
