ورلڊ ڪپ کيڏڻ لاءِ قومي ڪرڪيٽ ٽيم ڀارت ويندي يا نه؟ فيصلو ڪرڻ لاءِ پرڏيهي وزير بلاول ڀٽو زرداري جي سربراهي ۾ هاءِ پروفائيل ڪميٽي قائم ڪئي وئي آهي
ڪميٽي ۾ وفاقي گهرو وزير راڻا ثناءُ الله، اعظم نذير تارڙ، احسان مزاري ۽ مريم اورنگزيب شامل آهن، هاءِ پروفائيل ڪميٽي ۾ اسعد محمود، امين الحق، قمر زمان ڪائرا ۽ طارق فاطمي به شامل آهن
قومي سلامتي جي ادارن جا سربراهه ۽ پرڏيهي سيڪريٽري به هاءِ پروفائيل ڪميٽي ۾ شامل آهن، ڪميٽي قومي ٽيم جي ورلڊ ڪپ ۾ شرڪت لاءِ ڀارت وڃڻ بابت فيصلو ڪندي
هاءِ پروفائيل ڪميٽي جون سفارشون حتمي منظوري لاءِ وزيراعظم ڏانهن اماڻيون وينديون، پاڪستان ڪرڪيٽ بورڊ قومي ٽيم جي ورلڊ ڪپ ۾ شرڪت حڪومت جي اجازت سان مشروط ڪئي آهي
ورلڊ ڪپ ۾ پاڪستان ۽ ڀارت وچ ۾ 15 آڪٽوبر تي احمد آباد ۾ اهم دنگل رٿيل آهي