افغانستان ۾ دهشتگردن جي موجودگي خطي لاءِ خطرو بڻيل آهي، پاڪستان ايمنسٽي انٽرنيشنل جي رپورٽ رد ڪري ڇڏي

اسلام آباد:  پرڏيهي وزارت چيو آهي ته افغانستان ۾ دهشتگردن جي موجودگي خطي جي سلامتي لاءِ خطرو بڻيل آهي پاڪستان ايمنسٽي انٽرنيشنل جي رپورٽ کي مڪمل طور تي رد ڪري ٿو.

پرڏيهي وزارت جي ترجمان طاهر اندرابي هفتيوار پريس بريفنگ ڏيندي وچ اوڀر جي صورتحال تي  اظهار تشڪر ڪيو. هن چيو ته پاڪستان حوثي مليشيا طرفان سعودي عرب ۽ بحيره احمر ۾ ڪمرشل جهاز راني جي ڌمڪين جي مذمت ڪري ٿو.

هن چيو ته اسان سعودي عرب جي علاقائي سلامتي ۽ خودمختاري جي تحفظ جو ارادو رکون ٿا. هٿياربند گروپن طرفان سعودي عرب تي حملو خطي جي صورتحال کي وڌيڪ خراب ڪندو.  پاڪستان طرفان ڇڪتاڻ ۾ گهٽتائي لاءِ ڪوششون جاري آهن ايراني گهرو وزير انهي حوالي سان پاڪستان جو دورو ڪيو آهي.

طاهر اندرابي ٻڌايو ته 18 جولاءِ تي علاقائي صورتحال جي حوالي سان پاڪ ڪويت پرڏيهي وزير سان ڳالهيون ٿيون. گذريل ڏينهن منيلا ۾ آسيان اجلاس جي سائيڊ لائنز تي پاڪ مصر پرڏيهي وزيرن جي ملاقات ٿي. پاڪ مصر پرڏيهي وزيرن سمورن ملڪن جي علاقائي سالميت ۽ خودمختاري جي تحفظ تي زور ڏنو.

هن چيو ته منيلا ۾ پاڪ اومان پرڏيهي وزيرن جي به ملاقات ٿي آهي، نائب وزيراعظم اسحاق ڊار اڄ شنگهائي تعاون تنظيم جي پرڏيهي وزيرن جي اجلاس ۾ شرڪت لاءِ بشڪيڪ پهچندو، جتي انهي جي ڪرغزستان جي صدر سميت پنهنجن هم منصبن سان ملاقاتون ٿينديون.

ترجمان چيو ته نائب وزيراعظم منيلا ۾ آسيان ريجنل فورم جي 34هين اجلاس ۾ شرڪت ڪئي. پاڪستان 2004 کان آسيان ريجنل فورم جو ميمبر آهي. روس جي پرڏيهي وزير سرگئي لاوروف سان  نائب وزيراعظم جي ملاقات ۾ ٻطرفن لاڳاپن جي سمورن پهلوئن جو جائزو ورتو ويو. نائب وزيراعظم جي بنگلاديش جي پرڏيهي وزير، جنرل اسيمبلي جي نئين چونڊيل صدر خليل الرحمان سان به ملاقات ٿي آهي.

هن چيو ته پاڪستان ۽ ڪينيڊا زراعت،  واپار، سرمائيڪاري سميت  سمورن شuبن ۾ تعاون جي سمجهوتن تي صحيحون ڪيون. پاڪستان يورپي يونين ڪي جي ايس پي رپورٽ جي آجيان ڪري ٿو. يورپي يونين جي رپورٽ گڏيل طور تي پاڪستان طرفان ڪيل اڳڀرائي جو احاطو نٿي ڪري. جي ايس پي پلس درجو ٻنهي ڌرين جي لاءِ گڏيل طور تي فائديمند آهي. پاڪستان يورپي ڪميشن ۽ ٻين ادارن سان مثبت طور تي رابطه برقرار رکندو.

پرڏيهي وزارت جي ترجمان طاهر اندرابي جو چوڻ هو ته پاڪستان ايمنسٽي انٽرنيشنل جي رپورٽ کي مڪمل طور تي رد ڪري ڇڏيو آهي اها رپورٽ مڪمل طور تي بي بنياد آهي. افغانستان ۾ دهشتگردن گروپن جي  موجودگي علاقائي سلامتي جي لاءِ خطرو آهي، ڪابه ذميوار رياست پنهنجن شهرين کي نشانو بنائڻ جي صورت ۾ خاموش نٿي رهي سگهي.