ڪراچي: سنڌ جو اڳوڻو وڏو وزير سيد قائم علي شاهه به ڪورونا وائرس جو شڪار ٿي ويو آهي. سيد قائم علي شاهه جي وڪيل اڳوڻي وڏي وزير جي ميڊيڪل رپورٽ عدالت ۾ پيش ڪري ڇڏي.
تفصيل موجب سنڌ هاءِ ڪورٽ ۾ غيرقانوني ڀرتين ۽ اختيارن جي ناجائز استعمال واري ڪيس ۾ سنڌ جي اڳوڻي وڏي وزير سيد قائم علي شاهه، صوبائي وزير شرجيل ميمڻ ۽ ٻين جي ضمانت واري درخواست جي ٻڌڻي ٿي. ٻڌڻي دوران عدالت کي ٻڌايو ويو ته سنڌ جو اڳوڻو وڏو وزير سيد قائم علي شاهه ڪورونا وائرس ۾ مبتلا ٿي ويو آهي.
قائم علي شاهه جي ميڊيڪل رپورٽ عدالت ۾ پيش ڪئي وئي. اڳوڻي وڏي وزير جي وڪيل عدالت کي ٻڌايو ته سيد قائم علي شاهه بيمار هجڻ سبب پيش نٿو ٿي سگهي. سنڌ هاءِ ڪورٽ ۾ ٻڌڻي دوران صوبائي وزير شرجيل ميمڻ عدالت ۾ پيش ٿيو.
ٻڌڻي دوران نيب پراسيڪيوٽر چيو ته جوابدارن خلاف جاچ مڪمل ٿي چڪي آهي. جنهن تي عدالت شرجيل ميمڻ، قائم علي شاهه ۽ ٻين جي عبوري ضمانت ۾ 21 سيپٽمبر تائين واڌ ڪري ڇڏي ۽ نيب کان ايندڙ ٻڌڻي تي اڳڀرائي رپورٽ طلب ڪري ورتي