غزه تي اسرائيلي حملا: وڌيڪ 100 ڄڻا شهيد، فلسطينين جي وري واپسي، نيتن ياهو جي گهر ٻاهران مظاهرا، چڪريون
غزه: غزه تي اسرائيلي بمباري سان وڌيڪ 100 فلسطيني شهيد ٿيا، ٿورن ڏينهن ۾ اسرائيلي حملن ۾ مارجي ويل فلسطينين جو انگ 600 کان وڌي ويو. صيهوني فوج رفح ۾ به زميني آپريشن ۽ اترين علائقن طرفن اڳڀرائي ڪئي، جنهن سبب بي گهر فلسطيني هڪ دفعو ٻيهر علائقو ڇڏڻ تي مجبور ٿي ويا. هوڏانهن القسام برگيڊ غزه مان اسرائيلي گادي واري هنڌ تل ابيب تي ڪيترائي راڪيٽ حملا ڪيا جنهن سبب اسرائيلي علائقن ۾ خطري جا سائرن وڄڻ لڳا، جڏهن ته اسرائيل راڪيٽ ڪيرائڻ جي دعويٰ ڪئي وئي. هوڏانهن اسرائيل ۾ وزيراعظم نيتن ياهو خلاف عوامي احتجاج شدت اختيار ڪري ويو. عالمي ميڊيا جي رپورٽ موجب تل ابيب ۽ يروشلم ۾ نيتن ياهو جي گهر ويجهو اسرائيلي عوام وڏي تعداد ۾ جمع ٿي احتجاج ڪيو. رپورٽ ۾ ٻڌايو ويو آهي ته احتجاجي مظاهرا گهرو سيڪيورٽي ايجنسي شن بيت جي سربراهه رونن بار جي برطرفي ۽ غزه تي ٻيهر حملن خلاف ڪيا ويا پيا وڃن. احتجاج ڪندڙن جو چوڻ آهي ته نيتن ياهو جي حڪومت 59 يرغمالين کي واپس آڻڻ ۾ ناڪام ٿي وئي آهي، ملڪ ۾ هاڻي جمهوريت کي نقصان پهچائي آمريت طرف ڌڪيو پيو وڃي. احتجاج ڪندڙن جو چوڻ هو اسان اسرائيل ۾ ترڪيه ۽ ايران جيان جمهوريت دشمن عنصرن کي ڪامياب ٿيڻ نه ڏينداسين، نيتن ياهو ظلم بند ڪري، رپورٽ موجب جڏهن سوين احتجاج ڪندڙ نيتن ياهو جي گهر ٻاهران پهتا ته پوليس انهن کي رڪاوٽون وجهي طاقت جي ذريعي روڪيو واٽر ڪينن جو استعمال ڪندي ڪيترن ئي مظاهرين کي گرفتار پڻ ڪيو ويو. رپورٽ ۾ ٻڌايو ويو آهي ته نيتن ياهو جي حمايتين ۽ مظاهرين وچ ۾ جهڙپون پڻ ٿيون.