اسلام آباد: حڪومت پگهاردار طبقي کي فوري رليف ڏيڻ کان معذرت ڪري ڇڏي آهي. رپورٽ موجب قومي اسيمبلي جي اجلاس ۾ حڪومت پگهاردار طبقي تي بار وڌيڪ هجڻ کي مڃيندي انهي طبقي کي به فوري رليف کان معذرت ڪري ورتي آهي، اهڙي طرح کنڊ جي گهريلو ۽ ڪمرشل صارفين جي لاءِ ڌار ڌار قيمتون مقرر ڪرڻ جي خبر ٻڌائي ڇڏي آهي.
قومي اسيمبلي جو اجلاس گذريل ڏينهن ڊڦٽي اسپيڪر سيد غلام مصطفيٰ شاهه جي صدارت هيٺ ٿيو جنهن ۾ پگهاردار طبقي تي ٽيڪس جو وڌيڪ دٻآءُ هجڻ خلاف ڌيان ڏياريو نوٽيس جو جواب ڏيندي پارلياماني سيڪريٽري بلال اظهر ڪياني ٻڌايو ته وزيراعظم چوي ٿو ته پگهار طبقي تي ٽيڪس جو ڪافي بار آهي پر ملڪي معيشت جون حالتون اهڙيون آهن جو فوري طور تي ملازمن کي رليف ڏيڻ ممڪن نه آهي.
هن چيو آهي ته ريلوي ۾ هڪ هزار پوليس اهلڪار ڀرتي ڪيا پيا وڃن. بلوچستان ۾ ٽرين تي هاڻ 22 سيڪيورٽي اهلڪار مقرر ڪيا ويندا. بولان ۽ جعفر ايڪسپريس کي جلد بحال ڪيو ويندو. شاهد عثمان چيو آهي ته ڪميٽي کنڊ جي ڪمرشل ۽ گهريلو ڌار ڌار قيمتون مقرر ڪرڻ جي لاءِ 17 اپريل تائين ڪم مڪمل ڪري وٺندي. مملڪتي وزير شاهد عثمان جواب ڏيندي چيو ته معيشت جي بحالي ۾ هڪ سال لڳندو، قومي بچت اسڪيمن ۾ اسلامي سرمائيڪاري نه هجڻ جو ڌيان ڏياريو نوٽيس تي ايوان کي ٻڌايو ويو ته 64 ارب روپين جي اسلامي سرمائيڪاري ٿي چڪي آهي. جنهن کان پوءِ قومي اسيمبلي جو اجلاس اڻڄاتل مدي تائين ملتوي ڪيو ويو