موسمياتي تبديلي وڏو مسئلو، حڪومت کي چيتي جي رفتار سان هلڻ گهرجي پر ڪُميءَ وانگر هلي ٿي: سپريم ڪورٽ
اسلام آباد: سپريم ڪورٽ ۾ موسمياتي تبديلي اٿارٽي جيقيام متعلق ڪيس جي ٻڌڻي، چيئرمين ۽ ميمبرن جي مقرري ۾ دير تي عدالت ڪاوڙ جو اظهار ڪيو، جسٽس جمال مندوخيل رمارڪس ڏنا ته حڪومت کي چيتي جي رفتار سان هلڻ گهرجي پر اها ڪُميءَ جي رفتار هلي رهي آهي. عدالت ڪيس جي ٻڌڻي هڪ مهيني لاءِ ملتوي ڪري ڇڏي. سپريم ڪورٽ ۾ موسمياتي تبديلي اٿارٽي جي قيام واري معاملي تي ٻڌڻي ٿي. جنهن ۾ حڪومت پاران چيئرمين ۽ ميمبرن جي مقرري ۾ دير تي عدالت ڪاوڙ جو اظهار ڪيو. جسٽس جمال مندوخيل رمارڪس ڏنا ته موسمياتي تبديلي هڪ سنگين مسئلو آهي. پر حڪومت جي سست روي ڳڻتي جوڳي آهي. ايڊيشنل اٽارني جنرل عدالت کي ٻڌايو ته چيئرمين جي مقرري جي لاءِ ٽيون ڀيرو اشتهار ڏنو ويو آهي. جنهن تي جسٽس جمال مندوخيل سوال اُٿاريو ته پهريان ٻه ڀيرا اشتهار جو ڪو فائدو ٿيو؟ ايڊيشنل اٽارني جنرل جواب ڏنو ته جيڪي اميداور شارٽ لسٽ ٿيا اُهي ٻٽي شهريت رکندڙ هئا. جڏهن ته حڪومتي پاليسي مطابق ڪنهن اعليٰ عهدي تي ٻٽي شهري رکندڙ شخص کي مقرر نٿو ڪري سگهجي. عدالت صوبائي نمائندگي تي به سوال اُٿاريو. جسٽس امين الدين خان نشاندهي ڪئي ته خيبرپختونخوا کان وزير اعليٰ جي ڀاءُ فيصل امين کي ميمبر مقرر ڪيو ويو آهي. بلوچستان کان هڪ يونيورسٽيءَ جي وائيس چانسلر کي ميمبر مقرر ڪيو ويو آهي. جڏهن ته پنجاب ۽ سنڌ مان بيورو ڪريٽس کي نامزد ڪيو ويو آهي. جسٽس جمال مندوخيل چيو ته صوبن ۾ مالياتي تحفظ ايجنسيءَ جا سربراهه ڪيئن مقرر ٿيندا آهن سڀني کي خبر آهي ۽ ان اٿارٽي جي لاءِ به اهو ئي معاملو نظر اچي رهيو آهي. عدالت وڌيڪ پڇاڻو ڪيو ته ڇا رولز تيار ٿي چڪا آهن؟ جنهن تي ايڊيشنل اٽارني جنرل ٻڌايو ته رولز جو مسودو تيار ٿي چڪو آهي ۽ منظوريءَ جي لاءِ قانون واري وزارت کي موڪليو ويو آهي. جسٽس جمال مندوخيل ڪاوڙ جو اظهار ڪندي چيو ته 2017ع ۾ قانون ٺهيو، پر هن وقت تائين چيئرمين مقرر ناهي ٿي سگهي، نه ئي رولز مڪمل ٿيا. عدالت ڪيس جي ٻڌڻي هڪ مهيني لاءِ ملتوي ڪري ڇڏي.