سپريم ڪورٽ گلگت بلتستان جي اڳوڻي چيف جسٽس راڻا ايم شميم جي انڪشافن واري معاملي تي وزيراعظم عمران خان چيو آهي ته ن ليگ جي عدالتن تي اثرانداز ٿيڻ تاريخ رکي ٿي، انھن هميشه رياستي ادارن تي حملا ڪيا آهن.
وزيراعظم عمران خان جي صدارت هيٺ حڪومتي اڳواڻن جو اجلاس ٿيو، جنهن ۾ گلگت بلتستان جي اڳوڻي جج جي حلف نامي واري معاملي تي غور ڪيو ويو.
وزيراعظم جي گهرو معاملن واري صلاحڪار شهزاد اڪبر ۽ سينيٽر بئريسٽر علي ظفر معاملي جي قانوني پاسن کان آگاهه ڪيو.
بريفنگ ۾ شهزاد اڪبر چيو ته لڳي ٿو ته ان منصوبي جي پويان ن ليگ جو هٿ آهي، حلف نامي جو مقصد ن ليگ اڳواڻن خلاف ڪيسن کي تڪراري بڻائڻ آهي.
بئريسٽر علي ظفر بريفنگ ۾ چيو ته توهين عدالت تڏهن ٿيندي آهي جڏهن عدالتي ڪارروائي متاثر ٿيندي آهي.
ان موقعي تي وزيراعظم چيو ته ن ليگ جي عدالتن تي اثرانداز ٿيڻ جي پنهنجي تاريخ آهي، ن ليگ هميشه رياستي ادارن تي حملا ڪيا آهن.
هن چيو ته سياسي مافيا پنهنجي ڪيسن کان بچڻ لاءِ ڪنهن به حد تائين وڃي سگهي ٿي، ن ليگ ان معاملي ۾ پاڻ ملوث ٿي ويندي، معاملو عدالت ۾ آهي ان کي ڏسندي.
اتحادين جو ذڪر ڪندي وزيراعظم چيو ته اتحادين جا خدشا جلد دور ڪيا ويندا، اتحادي اسان جي فيملي وانگر آهن.
ياد رهي ته سپريم ڪورٽ گلگت بلتستان جي اڳوڻي چيف جسٽس رانا ايم شميم پنهنجي حلفي بيان ۾ چيو آهي ته هو ان واقعي جو شاهد هو جڏهن ان وقت جي چيف جسٽس آف پاڪستان ثاقب نثار هاءِ ڪورٽ جي جج کي حڪم ڏنو هو ته نواز شريف ۽ مريم نواز کي 2018ع جي عام چونڊن کان اڳ ضمانت تي آزاد نه ڪيو وڃي.
گلگت بلتستان جي سينيئر جج پنهنجي حلف نامي ۾ پاڪستان جي سينيئر جج جو حوالو ڏيندي لکيو آهي ته ميان محمد نواز شريف ۽ مريم نواز کي عام چونڊون ٿيڻ تائين جيل ۾ رهڻ گهرجي. جڏهن ٻئي طرف کان اطمينان آيو ته هو (ثاقب نثار) خاموش ٿي ويو ۽ چانهه جو ٻيو پيالو گهريو.