خوبصورتي جي خواهشمندن کي اسان هتي مختلف گهريلو ٽوٽڪا ۽ نسخا ڏسيندا ايندا آهيون جن تي مختلف قسمن جي ڳرن خرچن کان بچي به سگهجي ٿو ۽ چهري توڙي چمڙي لاءِ هاڃيڪار اثرن مان به جند ڇڏائي سگهجي ٿي نه رڳو ايترو پر ڪيترا ئي نسخا ۽ ٽوٽڪا توهان جو قيمتي وقت به بچائيندا آهن.
ان حوالي سان اسان هتي اڄ هڪ اهڙو تيل کڻي آيا آهيون جنهن کي خوبصورتي جي انيڪ فائدن لاءِ استعمال ڪري سگهجي ٿو.
تلسي جي تيل ۾ خوبصورتي بابت ڪيترائي اڻڳڻ فائدا آهن جن کي ڄاڻي ۽ ان جي استعمال سان خاص ڪري عورتن جو وڏو مسئلو حل ٿي سگهي ٿو.
تلسي جي تيل ۾ وٽامن ڪي، اينٽي آڪسيڊنٽ خاصيتون وڏي مقدار ۾ موجود هونديون آهن.
تلسي جو استعمال دوا ۾ ڪيو ويندو آهي پر گهڻي قدر ان جو استعمال جڙي ٻوٽين مان ٺهندڙ دوائن ۾ ڪيو ويندو آهي.
ماهرن جو چوڻ آهي ته تلسي جي تيل جو سڀ کان وڏو ۽ پهريون فائدو ڇڻندڙ وارن کي روڪي ۽ چمڙي کي قدرتي طور تي صاف شفاف بڻائڻ آهي.
انکانسواءِ تلسي جو تيل چمڙي جي ڪنهن به حصي ۽ وارن جي جَڙن ۾ لڳائڻ سان رت جو وهڪرو تيز ٿيندو آهي ۽ چمڙي ۽ وارن سان لاڳاپيل مسئلا تمام جلد حل ٿي ويندا آهن.
ماهرن چيو آهي ته جيڪڏهن آئرن ۽ زنڪ جي کوٽ نه هجڻ باوجود به توهان جا وار ڇڻي رهيا آهن ته تلسي جو تيل بهترين آپشن آهي، ان تيل جو استعمال هفتي ۾ رڳو هڪ ڀيرو اڌ ڪلاڪ کان هڪ ڪلاڪ تائين ڪرڻ گهرجي.
ٻئي پاسي اهو تيل سِڌي ريت چهري، خشڪ چمڙي تي ٻيهر داغن ۽ داڻن ۾ واڌ کي روڪڻ لاءِ به استعمال ڪيو ويندو آهي.
