اسلام آباد : پي ٽي آءِ جي احتجاج کانپوءِ اسلام آباد ۾ پي ٽي آءِ باني خلاف وڌيڪ 14 ڪيس داخل ڪيا ويا.اسلام آباد هاءِ ڪورٽ پي ٽي آءِ جي باني خلاف داخل ڪيس واپس وٺڻ لاءِ درخواست اڪلائي ڇڏي.اسلام آباد ۾ تحريڪ انصاف جي باني خلاف داخل ڪيسن جو انگ وڌي 76 ٿي ويو آهي.اسلام آباد پوليس پي ٽي آءِ جي باني خلاف ڪيسن جي نئين رپورٽ عدالت ۾ جمع ڪرائي ڇڏي.ان کان اڳ پوليس رپورٽ موجب پي ٽي آءِ جي باني خلاف اسلام آباد ۾ 62 ڪيس داخل ڪيا ويا هئا.پي ٽي آءِ باني جي ڀيڻ نورين نيازي ڪيس جا تفصيل طلب ڪري ورتا.نيب ۽ ايف آءِ اي جي ڪيسن جون رپورٽون عدالت ۾ پيش ڪيون ويون آهن، جڏهن ته ڪي پي ڪي، سنڌ ۽ بلوچستان جي ڪيسن جي رپورٽ به عدالت ۾ جمع ڪرائي وئي آهي.گهرو سيڪريٽري صوبن ۾ داخل ڪيسن جي رپورٽ به جمع ڪرائي ڇڏي آهي.عدالت ڪيس جا تفصيل پيش ڪرڻ بعد نورين نيازي جي درخواست اڪلائي ڇڏي.
