ڪراچي: 11 پاڪستاني هندن جي ڀارت پراسرار مارجي وڃڻ جو معاملو هن وقت تائين حل نه ٿي سگهيو آهي ان حوالي سان شفافيت جي کوٽ واضح نظر اچي رهي آهي ، ۽ ڀارت جي هٺ ڌرمي عروج تي آهي ، ان حوالي سان هندو خاندان جي سربراهه جي ڌيءَ شريمتي مُکي به هوش اڏاريندڙ انڪشاف ڪيا هئا . هن پنهنجي خاندان جي قتل جو ذميوار ڀارتي ڳجهي ايجنسي را کي قرار ڏنو هو .
هاڻي پاڪستان هندو ڪائونسل جي باني ۽ چيئرمين ڊاڪٽر راميش ڪمار جوڌپور ۾ هندو خاندان جي پراسرار قتل واري معاملي جي شفاف جاچ ڪرائڻ جو مطالبو ڪيو آهي .
سندس چوڻ آهي ته ڀارتي حڪومت ان معاملي ۾ انصاف جي تقاضن کي اهميت ڏي ، روايتي هٺ ڌرمي نه ڏيکاري . هي معاملو گهڻو سنگين آهي ۽ ان جي شفاف جاچ لازمي ڪرائي وڃي . متاثر ٿيل خاندان کي هر صورت ۾ انصاف ڏنو وڃي .
ان موقعي تي پاڪستان هندو ڪائونسل ڪجهه سوال به اٿاريا . راجستان جي علائقي جوڌ پور ۾ 11 پاڪستاني هندو وطن ڇڏيندڙ جي پراسرار قتل جو معاملو هن وقت تائين ڇونه حل ٿيو آهي ؟ مظلوم خاندان جي ڌيءَ موجب ذميوار ڪير آهن ؟ پاڪستاني حڪومت کي جاچ کان ڇو بي خبر رکيو پيو وڃي ؟ ڊاڪٽر رميش چيو ته ايندڙ پنجن ڏينهن تائين پاڪستاني هاءِ ڪميشن کي نه ٻڌايو ويو ته هندو ڪائونسل ڊپلوميٽڪ انڪليو ۾ ڀارتي سفارتخاني ٻاهران احتجاج جو حق محفوظ رکي ٿي