ڪچا بصر رڳو ڀوڙ يا سلاد جو ذائقو وڌائڻ جي لاءِ ئي ناهن، پر انهن جا صحت جي حوالي سان پڻ حيران ڪندڙ فائدا هجن ٿا.
ڪچي بصرن ۾ قدرتي اينٽي آڪسيڊنٽس، اينٽي بيڪٽيريل خاصيتون، وٽامنز ۽ منرلز موجود هوندا آهن جيڪي جسم تي ڪيترائي هاڪاري اثر ڇڏيندا آهن. ڪچي بصرن ۾ موجود فلاوونائڊز دل جي رڳن کي صاف رکڻ ۾ به مدد ڏيندا آهن.
ڪچا بصر بلڊ پريشر ۽ ڪوليسٽرول کي به گهٽ ڪرڻ ۾ مددگار هوندا آهن جيڪي دل جي دوري جي خطرن کي گهٽائن ٿا اهي خاص طور تي ٽائيٽ ٽو شگر جي مريضن لاءِ تمام گهڻا فائديمند آهن.
بصرن ۾ موجود سلفر مرڪب ۽ ڪوئرسينن رت جي شگر ليول کي بهتر طريقي سان ضابطي ۾ رکندا آهن. ڪچي بصرن ۾ وٽامن سي، زنڪ ۽ اينٽي آڪسيڊنٽس موجود هوندا آهن جيڪي جسم جي بچاءَ واري نظام کي وڌائيندا آهن.
انکان وڌيڪ ته ڪچا بصر وائرل ۽ بيڪٽيريل انفيڪشنز کان بچائڻ ۾ مددگار هوندا آهن، اهي جسم جو گرمي پد نارمل رکڻ ۾ پڻ مدد ڪندا آهن خاص طور تي گرمين جي موسم ۾ ڪچا بصر کائڻ سان جسم کي ٿڌاڻ ملندي آهي لوءِ لڳڻ کان بچاءُ ملندو آهي.
ڪچي بصرن ۾ فائبر هوندو آهي جيڪو آنڊن کي صاف رکڻ ۾ مدد ڏيندو آهي پري بايوٽڪ خاصيتون آنڊن ۾ صحتمند بيڪٽيريا کي فروغ ڏينديون آهن ۽ اينٽي آڪسيڊنٽس دماغ ۾ آڪسيڊيٽو دٻاءَ کي گهٽائيندا آهن جنهن سان يادداشت ۽ ذهني ڪارڪردگي بهتر ٿي سگهندي آهي.