ڪراچي: گھرو وزير ضياءَ لنجار پاران سنڌ ۾ اغوا وارداتون گھٽجڻ جي دعويٰ، سنڌ اسيمبلي ۾ خطاب ڪندي هن چيو ته پنوعاقل جي مغوي ٻار کي بازياب ڪرايو ويو آهي، ڏوهارين ۽ سندن سهولتڪارن جي ويجهو پهچي چڪا آهيون، ڪچي ۾ آپريشن دوران 26 ڌاڙيل مارجي چڪا آهن، مارجي ويل ڌاڙيلن ۾ انعام يافته ڌاڙيل به شامل آهن، هن چيو ته سنڌ مان افغان پناهگيرن کي پهرين اپريل کان ڪڍيو ويندو، سنڌ حڪومت افغان پناهگيرن جي واپسيءَ جا انتظام ڪري ڇڏيا آهن، سنڌ ۾ ڪنهن به پرڏيهي کي غيرقانوني طور رهڻ نه ڏنو ويندو، سنڌ ۾ رهندڙ غيرقانوني افغان پناهگير ڊيڊ لائين کان اڳ واپس هليا وڃن هن وفاق کان پوليس لاءِ جديد هٿيار ۽ بڪتر بند گاڏيون فراهم ڪرڻ جو مطالبو ورجايو، هن چيو ته ڪراچي ۾ اسٽريٽ ڪرائيم ۾ 50 سيڪڙو تائين گهٽتائي آئي آهي. هن چيو ته چوري يا ڦر ٿيل مال عام طور تي ڪاٻاڙين وٽ ويندو هو، جيڪي انهن شين کي ٽڪرا ڪري وڪرو ڪندا هئا. هن چيو ته ڪراچي کي درپيش چيلينجن ۽ مسئلن کان پاڪ ڪرڻ لاءِ شهر کي هٿيارن کان پاڪ ڪرڻ ضروري آهي. هتي ماڻهو پرائيويٽ گارڊز سان سفر ڪن ٿا، پر ڪوبه شخص ڪيترو به بااثر يا طاقتور ڇو نه هجي، قانون جي پاسداري ان لاءِ به لازمي آهي. هن چيو ته ”سيف سٽي پراجيڪٽ“تحت ڪراچي ۾14هزارمان 1300 ڪيميرائون لڳايون آهن، انهن ڪيميرائن کي به جديد نظام سان ڳنڍيو ويو آهي. هن چيو ته ڪچي ۾ بهتري آئي آهي. جڏهن مون وزارت سنڀالي، ان وقت يرغمالين جو انگ 35 هو، جڏهن ته هاڻي رڳو 3 آهي ، شڪارپور ضلعي ۾ ڪو به يرغمالي ناهي. هن چيو ته پوليس پنهنجي بهتر حڪمت عملي سان 600 شهرين کي ”هني ٽريپ“ (هرکجڻ) کان بچايو آهي. آئون وفاق کان مطالبو ٿو ڪريان ته اسان کي جديد هٿيار ۽ بڪٽر بند گاڏيون فراهم ڪيون وڃن، انهن هٿيارن جي اسان اداائگي پڻ ڪري چڪا آهيون.
