سکر: سنڌ ۾ پاڻي جي کوٽ وڌيڪ شدت اختيار ڪري ورتي آهي، سکر بئراج وٽ پاڻي جي کوٽ 72.56 سيڪڙو تي پهچي وئي، هزارين ايڪڙ زرعي زمين متاثر ٿيڻ جو امڪان ظاهر ڪيو ويو آهي.
سنڌ ۾ پاڻي جي گهرج گهٽجڻ باوجود کوٽ ختم نه ٿي سگهي آهي، سکر بئراج وٽ پاڻي جي کوٽ 72.56 سيڪڙو تي پهچي وئي، سنڌ ۾ مجموعي طور پاڻي کوٽ 54 سيڪڙو تي پهچي وئي آهي، جنهن سبب زرعي ۽ گهريلو سطح تي پاڻي جي فراهمي متاثر ٿي رهي آهي. هن وقت سکر بئراج وٽ پاڻي جو مٿانهون وهڪرو 13860 ڪيوسڪ ۽ هيٺانهون وهڪرو 6040 ڪيوسڪ رڪارڊ ڪيو ويو. جڏهن ته بئراج جي واهن کي پاڻي جي ضرورت 28,900 ڪيوسڪ آهي، واهن کي صرف 7020 ڪيوسڪ پاڻي فراهم ڪيو پيو وڃي.
دادو ڪئنال کي 3,100 ڪيوسڪ پاڻي گهرجي، پر واهه کي صرف 350 ڪيوسڪ پاڻي ملي رهيو آهي. نارا ڪئنال جي پاڻي گهرج 8,300 ڪيوسڪ آهي، پر رڳو 2700 ڪيوسڪ پاڻي ملي رهيو آهي. خيرپور فيڊر ايسٽ کي 1,500 ڪيوسڪ پاڻي گهرجي، پر انهي کي صرف 500 ڪيوسڪ پاڻي ملي رهيو آهي. روهڙي ڪئنال کي 11,500 ڪيوسڪ پاڻي گهرجي، جڏهن ته واهه کي صرف 2700 ڪيوسڪ ملي رهيو آهي.
ڪوٽڙي بئراج وٽ پاڻي جو مٿانهون وهڪرو 5305 ۽ هيٺانهون وهڪرو 200 ڪيوسڪ رڪارڊ ڪيو ويو آهي. پاڪستان جي ٻن وڏن پاڻي ذخيرن منگلا ۽ تربيلا ڊيم ۾ پاڻي جي گهٽتائي سبب سنڌ ۾ پاڻي جو بحران شدت اختيار ڪري ويو آهي. پاڻي جي کوٽ سبب سکر بئراج جي واهن ۾ وارا بندي وارو عمل جاري آهي، جنهن ڪري هزارين ايڪڙ زرعي زمين متاثر ٿيڻ جو خدشو آهي. انهي حوالي سان ماهرن خبردار ڪيو آهي ته جيڪڏهن پاڻي جي کوٽ تي فوري طور تي ڪنٽرول نه ڪيو ويو ته ايندڙ مهينن ۾ زرعي، گهريلو سطح تي پاڻي جو وڏو بحران پيدا ٿي سگهي ٿو.