پاڪ فوج رياست جي سلامتي ۽ استحڪام کي يقيني بڻائڻ لاءِ دهشتگردي خلاف ڪردار ادا ڪندي رهندي: آرمي چيف
راولپنڊي: آرمي چيف جنرل عاصم منير چيو آهي ته خارجين سميت دهشتگرد گروهه پاڪستان خلاف افغان سرزمين تان ڪارروائيون ڪري رهيا آهن، دهشتگرد حملن ۾ پرڏيهي هٿيارن جي استعمال جو ثبوت آهي، افغانستان اهڙن عنصرن جي محفوظ پناهه گاهه بڻيل آهي، خارجين ۽ انهن جي سهولتڪارن خلاف جنگ پنهنجي منطقي انجام تائين جاري رهندي.
آءِ ايس پي آر موجب آرمي چيف جنرل عاصم منير بنون جو دورو ڪيو، جتي ڪور ڪمانڊر پشاور سندس آجيان ڪئي، آرمي چيف کي جاري آپريشنز ۽ علائقي جي مجموعي سيڪيورٽي صورتحال تي بريفنگ ڏني وئي.
آءِ ايس پي آر ٻڌايو ته آرمي چيف سي ايم ايڇ بنون ۾ زخمي فوجين کان خيريت معلوم ڪئي ۽ سندن حوصلي کي ساراهيو، جڏهن ته هن شهيدن جي پونئيرن سان دلي تعزيت جو اظهار ڪيو.
فوجي جوانن کي خطاب ڪندي آرمي چيف چيو ته پاڪ فوج رياست جي سلامتي ۽ استحڪام کي يقيني بڻائڻ لاءِ دهشتگردي خلاف ڪردار ادا ڪندي رهندي، حملي جي رٿابندي ڪندڙن ۽ سهولتڪارن کي جلد انصاف جي ڪٽهڙي ۾ آندو ويندو.