ڪراچي: ڪينٽونمينٽ بورڊ اليڪشن 2021، ڪراچي جي ڊسٽرڪٽ اليڪشن ڪمشنر امين بشير قريشي وفاقي وزير علي زيدي، فيصل ڪنٽونمينٽ جي وارڊ نمبر 2 جي اميدوار محمد فاروق کي شوڪاز ۽ پي ٽي آئي ايم پي فردوس شميم نقوي ۽ بلال غفار کي وارننگ نوٽيس جاري ڪري ڇڏيا. ڊسٽرڪٽ اليڪشن ڪمشنر پاران وفاقي وزير علي زيدي کي جاري ڪيل شوڪاز نوٽيس ۾ ڄاڻايو ويو آھي تہ اسان جي مانيٽرنگ ٽيم کي معلومات ملي آھي تہ علي زيدي پي ٽي آئي اميدوارن کي فنڊز فراھم ڪيا آھن،ترقياتي فنڊز فيصل ڪنٽونمينٽ بورڊ وارڊ نمبر 2 جي اميدوارن کي فراھم ڪيا ويا آھن، ٻن ڏينهن ۾ جواب جمع ڪرايو وڃي نہ تہ توھان خلاف ڪارروائي ڪئي ويندي، جڏھن تہ فيصل ڪنٽونمينٽ بورڊ وارڊ 2 جي اميدوار محمد فاروق کي شوڪاز نوٽيس جاري ڪندي وارڊ جي حدن ۾ ترقياتي ڪم فوري طور تي بند ڪري 24 ڪلاڪن ۾ جواب طلب ڪري ورتو آھي، نوٽيس ۾ ڄاڻايو ويو آھي تہ جواب نہ ڏيڻ جي صورت ۾ معاملو اليڪشن ڪميشن آف پاڪستان کي لکيو ويندو ۽ قانون موجب ڪارروائي ڪئي ويندي،جڏھن تہ ڊسٽرڪٽ اليڪشن ڪمشنر پي ٽي آئي ايم پي ايم فردوس شميم نقوي ۽ بلال غفار کي وارننگ نوٽيس جاري ڪندي ڄاڻايو آھي تہ توھان اليڪشن ڪميشن جي رولز جي ڀڃڪڙي ڪري رھيا آھيو، ماڻھو فردوس شميم نقوي ۽ بلال غفار کي ڪيمپين ۾ شرڪت لاءِ دعوتون ڏين پيا، اسان کي خبر پئي آھي تہ توھان عسڪري فور فيصل ڪنٽونمينٽ بورڊ جي ايريا ۾ تقريب ۾ شرڪت ڪرڻ وڃو پيا، اھڙين سرگرمين کان پاسو ڪيو نہ تہ توھان خلاف اليڪشن ڪميشن جي قانون موجب ڪارروائي ڪئي ويندي.
