واشنگٽن :ناڻي واري وزير محمد اورنگزيب چيو آهي ته هو پگهاردار طبقي جي مسئلن کان آگاهه آهي، انهن تي وڌيڪ بار نه ٿو وجهي سگهي.فرانسيسي نيوز ايجنسي کي انٽرويو ڏيندي محمد اورنگزيب چيو ته هو پاڪستان ۾ پگهاردار طبقي جي مسئلن کان آگاهه آهي، پگهاردار طبقي تي ٽيڪس جو وڌيڪ بار نٿو وجهي سگهي.ناڻي واري وزير چيو ته صنعتي شعبو به وڌ کان وڌ ٽيڪس جي حد تائين پهچي چڪو آهي، زرعي آمدني مان ٽيڪس وصولي کي بهتر بڻايو وڃي ۽ رئيل اسٽيٽ، پرچون جي شعبن مان ٽيڪس آمدني کي وڌايو وڃي.هن چيو ته ملڪ ۾ 52 لک کان وڌيڪ انڪم ٽيڪس گوشوارا جمع ڪيا ويا آهن ۽ ٽيڪس جو بنياد 29 سيڪڙو وڌايو ويو آهي.قومي ايئر لائين جي نجڪاري جي حوالي سان ناڻي واري وزير چيو ته نومبر ۾ پي آءِ اي جي نجڪاري ڪئي ويندي. پي آءِ اي جي ٻولين جي ڇنڊڇاڻ جو موقعو ڏنو ويو، پي آءِ اي جي اثاثن جي ڇنڊڇاڻ سبب نجڪاري جو عمل دير ٿي ويو.محمد اورنگزيب وڌيڪ چيو ته پاڪستان تي ڪل قرض 258 ارب ڊالرن تائين پهچي ويو آهي، معيشت ۾ قرض جو حصو 69 سيڪڙو تائين پهچي ويو آهي.
