ڪراچي ۾ طوفاني برساتن دوران مختلف حادثن ۾ 15 ڄڻا حياتي وڃائي ويٺا، بجلي ۽ انٽرنيٽ سروس معطل
ڪراچي: ڪراچي ۾ مون سون جي طوفاني برساتن کان پوءِ ٻئي ڏينهن به شهر جي مختلف علائقن ۾ ڪٿي تيز ته ڪٿي هلڪي برسات جو سلسلو جاري رهيو، جڏهن ته موسميات کاتي اڄ ۽ سڀاڻي وڌيڪ برساتن جي اڳڪٿي ڪئي آهي.
شهر جي رستن تان گذريل ڏينهن واري برسات جو پاڻي ڪڍي ڇڏيو ويو، پر جيٽ لائن، عيسيٰ نڪري ۽ لياقت آباد مارڪيٽ ۾ پاڻي جي نيڪالي نه ٿي سگهي، جنهن سبب رهواسين کي سخت تڪليفن کي منهن ڏيڻو پيو.
محمودآباد، شاهه فيصل ڪالوني، صدر، ايم اي جناح روڊ، فريئر هال، پي اي سي ايچ ايس، گلشن اقبال، ڪورنگي ۽ ڊي فنس سميت ڪيترن ئي علائقن ۾ وقفي وقفي سان برسات جاري آهي.
برسات دوران مختلف حادثن ۾ 15 ڄڻن جي فوت، گلستان جوهر ۾ گهر جي ڀت ڪرڻ سبب 4 ڄڻا، شاهه فيصل ڪالوني ۾ ڪرنٽ لڳڻ سبب 2 نوجوان، جڏهن ته ڊي فنس ۽ شارع فيصل تي برساتي پاڻي ۾ ڪرنٽ سبب 2 ڄڻا فوت ٿيا، اورنگي ٽائون ۾ هڪ ٻار ۽ گرومندر وٽ نالي ۾ ٻڏي ويل شخص جي لاش پڻ ملي وئي.
شهر جي ڪيترن ئي علائقن ۾ بجلي ۽ انٽرنيٽ سروس ڪلاڪن تائين معطل رهي، انتظاميه صورتحال کي نظر ۾ رکندي اڄ عام موڪل جو اعلان ڪيو، گلستان جوهر، گلشن اقبال، ڪورنگي، محمودآباد، منظور ڪالوني، ڊي فنس ۽ ملير سميت ڪيترن ئي علائقن ۾ گذريل ڏينهن کان بجلي بند آهي.
ڪي اليڪٽرڪ عمران رانا چيو ته جيئن ئي حفاظتي ڪليئرنس ملندي ۽ پاڻي گهٽ ٿيندو، متاثر علائقن ۾ بجلي بحال ڪئي ويندي، پر شهرين ڪي اليڪٽرڪ جي دعوائن کي رد ڪندي سخت ردعمل جو اظهار ڪيو.
ميئر ڪراچي مرتضيٰ وهاب پريس ڪانفرنس دوران برسات شروع ٿيڻ تي شهرين کي اپيل ڪئي ته غيرضروري حرڪت کان پاسو ڪن ۽ گهرن يا آفيسن ۾ رهڻ کي ترجيح ڏين.
هن چيو ته ڪراچي ۾ گذريل ڏينهن 245 ملي ميٽر برسات ٿي، جنهن سبب سخت مشڪلاتون پيش آيون.
سوشل ميڊيا تي جاري بيان ۾ مرتضيٰ وهاب شهيد ملت روڊ استعمال نه ڪرڻ جي هدايت ڪندي چيو ته اتي نيڪالي جو ڪم جاري آهي.
ڪراچي جي ڪيترن ئي رستن تان اڃا تائين پاڻي نه نڪتو آهي، جن ۾ ايونيو صدر روڊ، ضياءُالدين روڊ، ايم آر ڪياني روڊ، گرومندر، نمائش، سنڌ اسيمبلي ۽ ڊرگ روڊ انڊر پاس شامل آهن، ڪيترن ئي هنڌن تي ٽريلر ڦاٿل آهن، ۽ ٽريفڪ جي رواني متاثر آهي.
شهر جي خسته حال رستن تي گڙها پئجي ويا آهن، ڪيترائي گاڏيون ۽ موٽر سائيڪلون اڃا تائين بيٺل آهن.
پاڪ فوج ۽ رينجرز جا اهلڪار رات دير تائين شهرين جي مدد لاءِ رستن تي موجود رهيا، خراب گاڏين کي ڪڍيو ويو، ۽ ميڪينڪل ٽيم سان گڏ گاڏين جي مرمت به ڪئي وئي.
شهر ۾ برساتي پاڻي، بجلي جي بندش ۽ حادثن سبب شهرين کي سخت ڏکيائين کي منهن ڏيڻو پيو.