واشنگٽن : آمريڪي صدر ڊونلڊ ٽرمپ دنيا جي 100 ملڪن تي جوابي ٽيرف لاڳو ڪرڻ جو اعلان ڪيو آهي.آمريڪي صدر ٽرمپ وائيٽ هائوس ۾ جوابي ٽيرف لاڳو ڪرڻ لاءِ ايگزيڪيوٽو آرڊر تي صحيح ڪئي ۽ هڪ تقرير ۾ چيو ته جوابي ٽيرف جو نفاذ آمريڪا لاءِ سٺو هوندو، اڄ آمريڪي تاريخ جي اهم ترين ڏينهن مان هڪ آهي.هن چيو ته اڄ اسان جي معاشي آزادي جو ڏينهن آهي، اسان ٽيرف مان گڏ ڪيل رقم کي پنهنجن قرضن جي ادائيگي لاءِ استعمال ڪنداسين، سالن کان آمريڪي شهري پاسيرا رهيا آهن، ٻيون قومون طاقتور ٿي ويون آهن، هاڻي آمريڪا جي خوشحالي جو وقت آهي ۽ اضافي ٽيرف لاڳو ڪرڻ سان مقابلو مضبوط ٿيندو ۽ شين جون قيمتون گهٽ ٿينديون، اسان ان رقم کي پنهنجن ٽيڪسن کي گهٽائڻ لاءِ استعمال ڪنداسين.هن اعلان ڪيو ته آمريڪا سڀني درآمدن تي 10 سيڪڙو ۽ پرڏيهي ٺهيل گاڏين تي 25 سيڪڙو اضافي ٽيڪس لاڳو ڪندو.هن چيو ته يورپي يونين تي 20 سيڪڙو، چين تي 34 سيڪڙو ۽ جاپان تي 24 سيڪڙو اضافي ٽيرف لاڳو ڪيو ويندو، جڏهن ته هندستان تي 26 سيڪڙو، اسرائيل تي 17 سيڪڙو ۽ برطانيه تي 10 سيڪڙو ٽيرف لاڳو ڪيو ويندو.آمريڪي صدر چيو ته پاڪستان اسان کان 58 سيڪڙو ٽيرف وصول ڪري ٿو، اسان پاڪستان تي 29 سيڪڙو ٽيرف لاڳو ڪيو آهي. جڏهن ته بنگلاديش تي 37 سيڪڙو ٽيرف لاڳو ڪيو ويندو. آمريڪي صدر ترڪي، سعودي عرب، قطر ۽ افغانستان تي 10 سيڪڙو ٽيرف جو اعلان ڪيو. ويٽنام تي 46 سيڪڙو، تائيوان تي 32 سيڪڙو، ڏکڻ ڪوريا تي 25 سيڪڙو، ٿائيلينڊ تي 36 سيڪڙو، سوئزرلينڊ تي 31 سيڪڙو، انڊونيشيا تي 32 سيڪڙو ۽ ملائيشيا تي 24 سيڪڙو جوابي ٽيرف لاڳو ڪيا ويا، جڏهن ته ڪمبوڊيا تي 49 سيڪڙو، ڏکڻ آفريڪا تي 30 سيڪڙو ۽ برازيل ۽ سنگاپور تي هر هڪ تي 10 سيڪڙو ٽيرف لاڳو ڪيا ويندا. آمريڪا جي لاڳو ڪيل ڊيوٽين عالمي منڊين ۾ هلچل مچائي ڇڏي آهي ۽ ڪيترن ئي ملڪن جي اڳواڻن پاران انهن جي مذمت ڪئي وئي آهي. ٽرمپ جي اعلانيل ٽيرف بعد جاپان جو نڪي انڊيڪس اٺن مهينن جي گهٽ سطح تي پهچي ويو، جڏهن ته آمريڪي ۽ يورپي اسٽاڪ فيوچرز پڻ سخت لاٿ جو شڪار ٿيا. آمريڪي اسٽاڪ مارڪيٽ فيبروري جي وچ کان وٺي لڳ ڀڳ 5 ٽريلين ڊالر جو نقصان کائي چڪو آهي . چين، جيڪو دنيا جي ٻئي نمبر تي وڏي معيشت رکندڙ ملڪ آهي، 20 سيڪڙو اڳ ۾ لڳايل ٽيڪس سان گڏ هڪ نئون 34 سيڪڙو محصول ڀوڳيندو. چين آمريڪا کي تازي ٽيڪسن کي فوري طور ختم ڪرڻ جي گهر ڪئي ۽ جوابي قدم کڻڻ جو اعلان به ڪيو آهي. آمريڪا هندستان کان درآمد ٿيندڙ شين تي 26 سيڪڙو محصول لڳايو، جڏهن ته هندستان کي اميد هئي ته ان کي ٽرمپ جي واپاري پاليسي مان ڪجهه رليف ملندو. البته، ٽرمپ انتظاميا دواسازي جي برآمدن کي ان محصول کان ڇوٽ ڏني آهي. آمريڪي خزاني جي سربراهه اسڪاٽ بيسنٽ سي اين اين سان ڳالهائيندي ٻين ملڪن کي چيو ته اهي جوابي ڪارروائي نه ڪن، ڇاڪاڻ ته ان سان صارفين لاءِ قيمتون سخت وڌي سگهن ٿيون. فيچ ريٽنگ جي آمريڪي تحقيقاتي سربراهه موجب، ٽرمپ جي دور ۾ آمريڪي درآمدي ٽيڪس جي شرح 2024 ۾ 2.5 سيڪڙو مان وڌي 22 سيڪڙو ٿي وئي. “اها شرح آخري ڀيرو لڳ ڀڳ 1910 ۾ ڏٺي وئي هئي . “اهو رڳو آمريڪي معيشت لاءِ نه پر عالمي معيشت لاءِ به هڪ نئون رخ آهي. ڪيترائي ملڪ ممڪنه طور تي اقتصادي بحران ۾ هليا ويندا،” اولي سونولا هڪ بيان ۾ چيو آهي ته. “جيڪڏهن هي ٽيڪس ڊگهي مدي تائين لاڳو رهيو ته سڀ واپاري اڳڪٿيون بيڪار ٿي وينديون.” “جوابي” محصول، ٽرمپ چيو ته، آمريڪا تي لڳايل ٻين ملڪن جي ڊيوٽين ۽ واپاري رڪاوٽن جو جواب آهن. هن دليل ڏنو ته نئين ٽيڪسن سان آمريڪا ۾ ڪارخانيداري نوڪريون وڌنديون هن وڌيڪ چيو ته. “ڏهاڪن کان وٺي، اسان جو ملڪ دوستن ۽ دشمنن ٻنهي طرفان ڦرجي رهيو هو،”. واپارين خبردار ڪيو آهي ته هي محصول عالمي معيشت کي سست ڪري سگهي ٿو، مندي جو خطرو وڌائي سگهي ٿو ۽ آمريڪي خاندانن لاءِ جيئڻ جي قيمت وڌائي سگهي ٿو. ڪينيڊا ۽ ميڪسيڪو، جيڪي آمريڪا جا سڀ کان وڏا واپاري ڀائيوار آهن، اڳ ۾ ئي ڪيترين ئي شين تي 25 سيڪڙو محصول ڀوڳي رهيا آهن ۽ انهن کي اضافي ٽيڪسن کان ڇوٽ ملي آهي. ڪجهه ريپبلڪن اڳواڻن به ٽرمپ جي سخت واپاري پاليسي تي ڳڻتي ظاهر ڪئي آهي. ٽرمپ جي اعلان جي ڪلاڪن اندر، آمريڪي سينيٽ 51-48 جي ووٽ سان هڪ قانون منظور ڪيو جيڪو ٽرمپ جي ڪينيڊا تي لڳايل ٽيڪسن کي ختم ڪندو. البته، ريپبلڪن جي ڪنٽرول هيٺ آمريڪي هائوس آف ريپرزينٽيٽوز مان ان جي منظوري جو امڪان گهٽ آهي. ٽرمپ جي چوٽي جي معاشي صلاحڪار، اسٽيون ميران، چيو ته “اهي محصول آمريڪا لاءِ ڊگهي مدي ۾ فائديمند رهندا، جيتوڻيڪ شروعاتي طور ڪجهه مشڪلاتون ٿي سگهن ٿيون.” وائيٽ هائوس جي ترجمان جو چوڻ آهي ته هي نوان جوابي محصول ڪجهه شين تي لاڳو نه ٿيندا، جهڙوڪ ٽامو، دواسازي، سيميڪنڊڪٽر، ڪاٺ، سون، توانائي، ۽ “ڪجهه معدنيات جيڪي آمريڪا ۾ دستياب نه آهن،” ٽرمپ هڪ ايگزيڪيٽو آرڊر تي صحيح به ڪئي، جنهن تحت چين مان 800 ڊالر يا ان کان گهٽ ماليت جا سامان بغير ٽيڪس جي درآمد ڪرڻ واري قانون کي ختم ڪيو ويو، جيڪو 2 مئي کان لاڳو ٿيندو. آمريڪا جي اينٽي نارڪوٽڪس آفيسرن موجب چيني ڪيميڪل ٺاهيندڙ ڪمپنيون ميڪسيڪو جي منشيات وڪرو ڪندڙ گروپن کي فينٽانيل ٺاهڻ لاءِ خام مال فراهم ڪن ٿا ۽ انهن تي ٽرمپ نئين محصولن جو منصوبو جوڙي رهيو آهي، جن ۾ سيميڪنڊڪٽر، دواسازي ۽ اهم معدنيات شامل آهن. ٽرمپ جي نئين محصولن سان مالياتي منڊيون ۽ ڪاروباري ادارا متاثر ٿيا آهن، جيڪي ڏهاڪن کان جاري واپاري بندوبستن تي ڀاڙيندا رهيا آهن. آسٽريليا جي وزيراعظم انٿوني البانيز چيو ته ٽرمپ جو فيصلو “هڪ دوست جو عمل نه آهي”، هن آمريڪا تي جوابي محصول لڳائڻ کان انڪار ڪيو.
