برسبين : قومي وائيٽ بال ٽيم جي ڪپتان محمد رضوان جو چوڻ آهي ته آسٽريليا خلاف سيريز آسان ناهي پر ٽيم ۾ پاڪستان جي فتح لاءِ بهترين رانديگرن کي شامل ڪرڻ جي ڪوشش ڪئي ويندي.برسبين ۾ ميڊيا جي نمائندن سان ڳالهائيندي محمد رضوان چيو ته جڏهن توهان انٽرنيشنل ڪرڪيٽ کيڏندا آهيو ته چئلينجز سامهون ايندا آهن، آسٽريليا خلاف آسٽريليا ۾ کيڏڻ آسان ناهي.پلينگ اليون جي حوالي سان سوال تي محمد رضوان چيو ته پليئنگ اليون بابت ڳالهه ٻولهه ٿي آهي پر ڪجهه ڳالهيون ڳجهيون هونديون آهن، مان هميشه صلاح سان کيڏندو آهيان، ٽيم لاءِ بهتر فيصلا ڪندا.هڪ سوال جي جواب ۾ قومي ٽيم جي ڪپتان چيو ته فخر زمان، افتخار احمد، محمد عامر ۽ شاداب خان بهترين رانديگر آهن ۽ ڊگهي عرصي تائين پاڪستان جي خدمت ڪئي آهي، انهن جي غير موجودگي آساني سان پوري نه ٿي ڪري سگهجي.قومي ٽيم جي هيڊ ڪوچ جيسن گلسپي بابت پڇڻ تي محمد رضوان چيو ته گلسپي آسٽريليا جو آهي پر هو پاڪستان جي نمائندگي ڪري رهيو آهي، هو محنت ڪري ٽيم کي گڏ رکندو آهي.چيمپيئنز ٽرافي ۾ ڀارتي ٽيم جي آمد بابت سوال تي محمد رضوان چيو ته جيڪڏهن ڀارتي ٽيم ايندي ته ڀليڪار ڪيو ويندو، پر اهو فيصلو بورڊن جو هوندو آهي ته ڇا ڪرڻ گهرجي ۽ ڇا نه ڪرڻ، اسان کي اميد آهي. ڀارتي ٽيم پاڪستان ايندي.
