حڪومت جو ڪالعدم ٽي ايل پي سربراهه سعد رضوي سان جيل ۾ ڳالهين جو فيصلو

لاهور: حڪومت ڪالعدم ٽي ايل پي جي سربراهه سعد رضوي سان جيل ۾ ڳالهين جو فيصلو ڪيو آهي.

وفاقي گهرو وزير شيخ رشيد جي صدارت هيٺ لاهور ۾ اهم اجلاس ٿيو، پنجاب سيف سٽي اٿارٽي آفيس ۾ ٿيل اجلاس ۾ وفاقي ۽ صوبائي وزير پڻ شريڪ ٿيا، جن ۾ نورالحق قادري، علي امين گنڊاپور، راجا بشارت، آءِ جي پنجاب ۽ ٻيا شامل هئا.

ذريعن موجب اجلاس ۾ شيخ رشيد کي ڪالعدم ٽي ايل پي جي مارچ جي حوالي سان بريفنگ ڏني وئي ۽ فيصلو ڪيو ويو ته حڪومتي ٽيم اڄ ڪوٽ لکپت جيل ويندي، ڪميٽي ۾ هڪ وفاقي وزير ۽ هڪ صوبائي وزير شامل هوندو، جيڪي ڪوٽ لکپت جيل ۾ قيد سعد رضوي سان ڳالهيون ڪندا.

واضح رهي ته وزيراعظم عمران خان سعودي عرب روانو ٿي چڪو آهي، جڏهن ته هن شيخ رشيد، نور الحق قادري ۽ راجا بشارت تي ٻڌل حڪومتي ڪميٽي کي ڪالعدم ٽي ايل پي سان ڳالهيون ڪري معاملا حل ڪرڻ جي هدايت ڪئي آهي.

ان کان اڳ پاڪ – ڀارت ميچ ڏسڻ لاءِ دبئي ويل وفاقي گهرو وزير شيخ رشيد وزيراعظم جي هدايتن تي هنگامي طور واپس ڏيهه پهتو.

جواب شامل کریں

آپ کا ای میل ایڈریس شائع نہیں کیا جائے گا۔