اسلام آباد : اسلام آباد جي ڪشمير هاءِ وي تي ٿيل روڊ حادثي ۾ 4 ڄڻا فوت ۽ 2 ڄڻا زخمي ٿي پيا آهن، پوليس وفاقي محتسب ڪشمالا طارق جي مڙس کي گرفتار ڪري ورتو، اکين ڏٺن شاهدن جو چوڻ آهي ته حادثو جي اليون سگنل تي پروٽوڪول ۾ ويندڙ 5 گاڏين پاران سگنل ٽوڙڻ سبب پيش آيو. هڪ فور ويلر گاڏِي ننڍي گاڏيءَ ۽ موٽرسائيڪل کي ٽڪر هنيو جنهن سبب امير شڪيل ، فاروق ۽ حيدرعلي سميت چار ڄڻا فوت ۽ ٻه ڄڻا زخمي ٿي پيا، فوتين جا مڙهه ۽ زخمين کي اسپتال منتقل ڪيو ويو، جتي زخمين کي طبي امداد فراهم ڪئي وئي، گاڏين ۾ وفاقي محتسب ڪشمالا طارق جو مڙس ۽ پٽ به موجود هئا. پوليس ڪشمالا طارق جي مڙس وقاص خان کي گرفتار ڪري ٿاڻي تي منتقل ڪري ڇڏيو آهي جڏهن ته سندس ڊرائيور کي به گرفتار ڪيو ويو.
