حنا جاويد قتل ڪيس: ماهره خان، هانيه عامر سميت شوبز شخصيتن انصاف جو مطالبو ڪري ڇڏيو

راولپنڊي:  راولپنڊي ۾ حنا جاويد جي مبينه قتل جي واقعي تي پاڪستان شوبز انڊسٽري جي ڪيترين ئي شخصيتن آواز اٿاريندي متاثره خاندان سان يڪجهتي جو اظهار ۽ شفاف جاچ جو مطالبو ڪيو آهي.

حنا جاويد 20 آگسٽ تي راولپنڊي جي گهر ۾ مئل حالت ۾ هٿ آئي هئي، انهي جي ڀاءُ فهد جي مدعيت ۾ حنا جي مڙس اصغر امام، سُهري ۽ گهريلو ملازم جي خلاف قتل جو ڪيس داخل ڪيو ويو، ڪيس جي جاچ جاري آهي جوابدارن تي لڳايل الزام اڃان تائين عدالت ۾ ثابت نه ٿيا آهن.

حنا جاويد جي ڪيس تي ماهره خان، هانيه عامر، عفت عمر، عثمان خالد بٽ ۽ ثمر جعفري سميت ڪيترين ئي شوبز شخصيتن سوشل ميڊيا تي رد عمل ڏنو آهي.

ماهره خان:

اداڪاره ماهره خان حنا جاويد جي لاش هٿ اچڻ واري معاملي تي ڏک ۽ ڪاوڙ جو اظهار ڪندي سوال ڪيو ته هي ڪهڙي دنيا آهي؟ اسان ڪهڙي قسم جي نام نهاد مردن جي پرورش ڪري رهيا آهيون؟ ماهره حنا جي گهر ڀاتين سان يڪجهتي جو اظهار ڪندي انهن کي هر ممڪن تعاون جي آڇ به ڪئي ۽ چيو ته هو انهن جي ڏک ۽ نقصان جو سوچي نٿي سگهي.

هانيه عامر ۽ ثمر جعفري:

اداڪاره هانيه عامر ۽ اداڪار ثمر جعفري به حنا جاويد جي لاءِ انصاف جو مطالبو ڪيو. ٻنهي فنڪارن انسٽاگرام تي جسٽس فار حنا پيج جي پوسٽ پنهنجي اسٽوريز تي شيئر ڪيون. مذڪوره پيج تي حنا جي گهر ڀاتين طرفان انهي سان مبينه تشدد ۽ ناروا سلوڪ بابت دعويٰ به شيئر ڪيا ويا آهن.

عفت عمر:

اداڪاره، ماڊل عفت عمر پنجاب جي وزيراعليٰ مريم نواز کان معاملي جو نوٽيس وٺڻ ۽ عورتن جي خلاف تشدد تي آواز اٿارڻ جو مطالبو ڪيو. هن چيو ته انصاف جو مطالبو ڪندڙ عام ماڻهن جي مقابلي ۾ وزيراعليٰ وٽ وڌيڪ اختيار موجود آهي، انهي لاءِ انهي کي استعمال ڪندي متاثره عورت جي لاءِ آواز اٿارڻ گهرجي.

عثمان خالد بٽ:

اداڪاره عثمان خالد بٽ حنا جاويد جي سامهون ايندڙ تفصيلن کي خوفناڪ قرار ڏيندي سوال اٿاريو ته ڇا هن ڀيري متاثره خاندان کي واقعي انصاف ملي سگهندو؟ هن جو چوڻ هو ته ماضي ۾ به اهڙن واقعن تي عوامي ڏک ۽ ڪاوڙ ڏسڻ ۾ آئي، گرفتاريون ٿيون ۽انصاف جا مطالبا ڪيا ويا، پر ضروري آهي ته حنا جي گهر ڀاتين کي انصاف حاصل ڪرڻ جي لاءِ سالن تائين نظام سان نه وڙهڻو پوي. جڏهن ته اداڪاره مشي خان، سجل علي، رابعه ڪلثوم ۽ ٻين طرفان به حنا جاويد قتل جي شفاف ۽ غير منصفاڻي جاچ جو مطالبو ڪندي قاتلن کي جلد کان جلد گرفتار ڪرڻ جو مطالبو ڪيو آهي.

حنا جاويد ڪيس تي شوبز شخصيتن طرفان سامهون ايندڙ رد عمل کان پوءِ سوشل ميڊيا تي به انصاف ۽ شفاف جاچ جو مطالبو تيزي سان وڌي رهيو آهي. ڪيس جي جاچ ۽ قانوني ڪارروائي کان پوءِ ئي واقعي جون اصل حقيقتون سامهون اچي سگهنديون ۽  قاتل گرفتار ٿي سگهندا.