لاهور: پاڪستان ڪرڪيٽ ٽيم جي آل رائونڊر عامر جمال تي تحريڪ انصاف باني عمران خان جي حمايت واري ڪيپ پائڻ تي 13 لک رپيا ڏنڊ لاڳو ڪيو ويو.
راندين جي ويب سائيٽ ”ڪرڪ انفو“ موجب گذريل سال انگلينڊ خلاف هوم ٽيسٽ سيريز دوران ٽريننگ واري ڏينهن عامر جمال جيڪا ٽوپي پاتي هئي، ان تي ”804“ لکيل هو.
حقيقت ۾ 804 اڳوڻي وزيراعظم عمران خان جو قيدي نمبر آهي ۽ اهو نمبر سندس ڪارڪنن ۽ چاهيندڙن ۾ مقبول آهي، جيڪو اڪثر پي ٽي آءِ جا حامي استعمال ڪندا آهن.
عامر جمال طرفان اهڙي ڪيپ پائڻ جو معاملو پي سي بي جي ضابطن جي ڀڃڪڙي ۾ شمار ڪيو ويو ۽ مٿس ڪوڊ جي شق 2.23 تحت ڏنڊ لاڳو ڪيو ويو.
ان شق ۾ چيو ويو آهي ته رانديگر ڪنهن به حساس، فرقيواراڻي، نسلي، سياسي معاملي تي تبصرو نٿو ڪري سگهي.
واضح رهي ته گذريل سال انگلينڊ خلاف ملتان ٽيسٽ کان ويندي ڏکڻ آفريقا جي سيريز تائين رانديگرن تي تقريبن 33 لک رپين جو مجموعي ڏنڊ لاڳو ڪيو ويو.
سڀ کان وڏو ڏنڊ سياسي نعري واري ڪيپ پائڻ تي عامر جمال تي لاڳو ڪيو ويو، جڏهن ته آسٽريليا جي سيريز ۾ رات دير سان هوٽل پهچڻ تي سلمان علي آغا، صائم ايوب ۽ عبدالله شفيق تي 5-5 لک رپيا ڏنڊ لاڳو ڪيو ويو.
