صدر عارف علوي چيف اليڪشن ڪمشنر سڪندر سلطان راجا جي نالي خط لکيو آهي جنهن ۾ چيو آهي ته مون 9 آگسٽ تي وزيراعظم جي مشوري تي اسيمبلي تحليل ڪئي ، هن چيو ته هاڻي عام چونڊون 6 نومبر2023 تي هئڻ گهرجن .
خط ۾ چيو ويو آهي ته صدر جو اختيار آهي ، عام چونڊن لاءِ 90 ڏينهن جي اندر جي تاريخ مقرر ڪري . آئيني ذميواري پوري ڪرڻ خاطر چيف اليڪشن ڪمشنر کي ملاقات لاءِ سڏيو آهي ته جئين آئين ۽ ان جي حڪم کي لاڳو ڪرڻ جو طريقو واضح ڪيو وڃي .
صدر جي خط جي متن موجب چيف اليڪشن ڪمشنر جواب ۾ ان جي ابتڙ موقف اختيار ڪيو ته اهو اليڪشن ڪميشن جو اختيار آهي . وفاق کي مضبوط بڻائڻ لاءِ قومي اسيمبلي ۽ صوبائي اسيمبلين جون عام چونڊون هڪ ئي ڏينهن ڪرائڻ تي اتفاق آهي .
هن خط ۾ چيو آهي ته اليڪشن ڪميشن آزادانه،منصفاڻي چونڊن لاءِ آئيني ۽ قانوني اپائن جي پابندي ڪري ۽ اليڪشن ڪميشن قومي ۽ صوبائي اسيمبلين ۾ هڪ ئي ڏينهن چونڊون ڪرائڻ لاءِ اعليٰ عدليه کان رهنمائي حاصل ڪري .
صدر عارف علوي خط ۾ وڌيڪ چيو آهي ته آگسٽ ۾ آدمشماري جي اچڻ کانپوءِ تڪ بندين جو عمل به جاري آهي ،آئين جي آرٽيڪل 51 (5) ۽ اليڪشن ايڪٽ جي سيڪشن 17 هيٺ اها لازمي شرط آهي .