ڪراچي: (ڇنڇر: ڪراچي ۾ گرفتار ٿيل سنڌ جي اڳوڻي گورنر ۽ تحريڪ انصاف اڳواڻ عمران اسماعيل کي ڊسٽرڪٽ جيل شڪارپور اماڻڻ جو فيصلو ڪيو ويو آهي.
سنڌ جي گهرو وزارت موجب عمران اسماعيل ڀڃ ڊاهه، گهيراءُ ۽ روڊ بند ڪرڻ جي لاءِ ماڻهن کي ڀڙڪايو، جڏهن ته ملڪ ۽ قوم جي جان، مال کي نقصان پهچائڻ جي ڪوشش ڪئي.
ياد رهي ته عمران اسماعيل کي گذريل رات ڊفينس فيز 8 ويجهو گرفتار ڪيو ويو هو. ذريعن موجب عمران اسماعيل کي ڪراچي ۾ دهشتگردي جي ڪيسن ۾ گرفتار ڪيو ويو هو. اڳوڻي گورنر خلاف ٽيپو سلطان ۽ فيز آباد ٿاڻن ۾ ڪيس داخل ٿيل آهن.
عمران اسماعيل کان اڳ پي ٽي آءِ جي ٻين اڳواڻن کي به گرفتار ڪيو ويو آهي جن ۾ شاهه محمود قريشي، اسد عمر، فواد چوڌري، شيرين مزاري، فردوس شميم نقوي ۽ علي زيدي سميت ڪيترائي ٻيا اڳواڻ شامل به آهن. پي ٽي آءِ اڳواڻ علي زيدي کي جيڪب آباد جڏهن ته فردوس شميم نقوي کي سکر جيل منتقل ڪيو ويو آهي.