ڪراچي: ڪراچي ۾ بلديا فيڪٽري سانحي کي 8 سال گذري ويا آهن پر متاثر اڄ به انصاف جي اوسيئڙي ۾ ويٺل آهن .
بلديا ٽائون ۾ موجود گارمينٽس فيڪٽري ۾ لڳل خوفناڪ باهه ۾ 260 ماڻهو جيئري ئي سڙي ويا هئا .
بلديا ٽائون ۾ حب ريور روڊ تي واقعي گارمينٽس فيڪٽري علي انٽر پرائزز ۾ ڀتو نه ڏيڻ تي 11 سيپٽمبر2012 تي باهه ڏني وئي هئي جنهن جي نتيجي ۾ ڪم ڪندڙ 260 ماڻهن جيئري ئي سڙي ڪوئلو ٿي ويا هئا .
فيڪٽري ٻاهران موجود بي وسي جي تصوير بڻيل انهن جا وارث پنهنجي پيارن جون رڙيون ٻڌي به ڪجهه نه پئي ڪري سگهيا ۽ پنهنجي پيارن کي باهه ۾ جيئرو ئي سڙندو ڏسندا رهيا.
هر يارهين سيپٽمبر تي اهي سڀئي زخمي وري تازا ٿي وڃن ٿا ،دهشتگردي ٽوڙ عدالت 3 سال 7 مهينن کانپوءِ ڪارروائي مڪمل ٿيڻ کانپوءِ بلديا فيڪٽري سانحي ڪيس جو فيصلو محفوظ ڪري ورتو آهي جيڪو 17 سيپٽمبر تي ٻڌايو ويندو .