اسلام آباد: آءِ ايم ايف اصولي طور تي ايف بي آر جي درخواست تي پراپرٽي جي خريداري تي لڳايل ود هولڊنگ ٽيڪس جي شرح اپريل 2025ع کان 2 سيڪڙو گهٽ ڪرڻ جي جزوي رعايت ڏيڻ تي راضپو ظاهر ڪري ڇڏيو آهي جڏهن ته وڪرو ڪندڙن تي لڳايل ود هولڊنگ ٽيڪس جي شرح برقرار رهندي.
آءِ ايم ايف پراپرٽي خريدارن تي فيڊرل ايڪسائيز ڊيوٽي(ايف اي ڊي) گهٽ ڪرڻ تي به اتفاق ڪيو آهي جڏهن ته وڪرو ڪندڙن کان اهو ٽيڪس لاڳيتو وصول ڪيو ويندو. اهڙي طرح ايف بي آر جي درخواست تي هلندڙ مهيني(مارچ2025) جو ٽيڪس حدف 60 ارب روپيه گهٽ ڪرڻ تي به آءِ ايم ايف اتفاق ڪري ورتو آهي.
اعليٰ سرڪاري ذريعن نجي چينل سان ڳالهيون ڪندي تصديق ڪئي ته ريئل اسٽيٽ ۽ تعميراتي شعبي جي لاءِ هڪ وڏي ۽ ڊگهي عرصي کان اڳڀرائي ۾ حڪومت آءِ ايم ايف کي راضي ڪري ورتو آهي ته هو خريدار جي لاءِ ود هولڊنگ ٽيڪس جي شرح 2 سيڪڙو گهٽ ڪري.
پاڪستاني اختيارين ۽ آءِ ايم ايف جي وچ ۾ جمعي جي رات ورچوئل ملاقات ٿي، پاڪستاني اختيارين جو چوڻ هو ته اها اڳڀرائي ميمورنڊم آف اڪنامڪ اينڊ فنانشل پاليسيز تي اتفاق راءِ ۽ عملي جي سطح تي معاهدي ايس ايل اي جي راهه هموار ڪندي، جنهن جو امڪان آهي ته ايندڙ هفتي تائين طئي ٿي ويندو.