اسلام آباد: سموري ملڪ ۾ يوم پاڪستان جو ڏهاڙو ملي جوش ۽ جذبي سان ملهايو ويو. ڏينهن جي شروعات وفاقي راڄڌاني ۾ 31 ۽ صوبائي راڄڌانين ۾ 21، 21 توپن جي سلامي سان ٿي. فضا پاڪ فوج جي جوانن جي الله اڪبر ۽ پاڪستان زنده باد جي نعرن سان گونجي اٿيو. مسجدن مان ملڪ جي سالميت، ترقي ۽ خوشحالي لاءِ دعائون گهريون ويون.
يوم پاڪستان جي موقعي تي لاهور ۾ علامه اقبال جي مزار تي گارڊز جي تبديلي جي پروقار تقريب منعقد ٿي، پاڪ فضائيه جي دستي گارڊ جا فرض سنڀالي ورتا. تقريب ۾ سول ۽ عسڪري اختياريون به شريڪ ٿيون، جڏهن ته ايئر وائس مارشل اختر عمران سدوزئي مهمان خصوصي هئي، ايئر وائس مارشل اختر عمران سدوزئي پريڊ جو معائنو ڪيو، ايئروفرس ۽ رينجرز جي چاڪ چوبند دستي کيس سلامي ڏني.
مهمان خصوصي ايئر وائس مارشل اختر عمران سدوزئي مزار اقبال تي گل چاڙهيا ۽ فاتحه خواني ڪئي ۽ مزار اقبال تي مهمانن جي ڪتاب ۾ پنهنجا تاثرات قلمبند ڪيا.
ٻئي طرف صدر آصف علي زرداري ۽ وزيراعظم شهباز شريف تاريخ ڏينهن يوم پاڪستان جي موقعي تي سموري قوم کي مبارڪباد پيش ڪئي آهي. پنهنجي پيغام ۾ صدر آصف علي زرداري چيو ته اهو جذبو جنهن پاڪستان کي وجود بخشيو، اسان کي هڪ روشن مستقبل جي طرف کڻي وڃي سگهي ٿو. پاڪستان کي اڄ سياسي، معاشي ۽ سيڪيورٽي چيلينجن کي منهن ڏيڻو پئجي رهيو آهي.
هن چيو ته اسان دهشتگردي جو مقابلو ڪري رهيا آهيون، بهادر هٿياربند فوج ملڪ جي دفاع لاءِ وڏيون قربانيون ڏئي رهي آهي، پنهنجي خودمختياري ۽ جغفرافيائي سالميت جي دفاع لاءِ ثابت قدم رهندي. اسان جو سفر مشڪل ضرور آهي پر ناممڪن نه آهي.
وزيراعظم شهباز شريف پنهنجي پيغام ۾ چيو ته گذريل هڪ سال ۾ اسان پاڪستان جي معيشت کي پائيدار ترقي جي رستي تي گامزن ڪيو، اقتصادي اشارن بهتري سان گڏ اسان پنهنجي معيشت کي مضبوط ڪيو. هن چيو ته قومي اتحاد سان اسان معاشي خوشحالي حاصل ڪري سگهون ٿا، هٿياربند فوج، سيڪيورٽي ادارا، ملڪي خودمختاري ۽ استحڪام جي حفاظت ۾ مصروف عمل آهن، ملڪ جي حفاظت لاءِ حياتيون قربان ڪندڙ شهيدن کي سلام آهي.