ممبئي : بالي ووڊ جي بادشاهه شاهه رخ خان آخرڪار پنهنجي 33 سالن جي فلمي ڪيريئر ۾ پهريون قومي ايوارڊ کٽي ورتو آهي.سڄي دنيا ۾ ‘بالي ووڊ جي بادشاهه’ جي نالي سان مشهور شاهه رخ خان 1992ع ۾ فلم ‘ديوانا’ سان پنهنجو فلمي سفر شروع ڪيو ۽ جلد ئي هندستان جي مشهور ترين اداڪارن مان هڪ بڻجي ويو.پنهنجي فلمي ڪيريئر ۾، هن ‘دل والي دلهنيا لي جائينگي’، ‘چڪ دي! انڊيا’، ‘ڪچ ڪڇ هوتا هي’ جهڙين مشهور فلمن ۾ پنهنجي شاندار اداڪاري سان مداحن جي دلين تي راڄ ڪيو.شاهه رخ خان پنهنجي 33 سالن جي فلمي ڪيريئر ۾ ڪيترائي وڏا ايوارڊ پڻ کٽيا آهن، ۽ کيس ٻين ملڪن مان ڪيترن ئي بين الاقوامي ايوارڊن سان پڻ نوازيو ويو آهي، پر هو هڪ ڀيرو به هندستان جو قومي ايوارڊ نه کٽي سگهيو آهي.بهرحال، شاهه رخ خان جو خواب آخرڪار پورو ٿيو آهي.ڀارتي ميڊيا موجب، شاهه رخ خان پنهنجي فلمي ڪيريئر جي 33 سالن کان پوءِ پنهنجو پهريون قومي فلم ايوارڊ کٽيو آهي. هن کي هي ايوارڊ 2023 ۾ رليز ٿيل فلم ‘جوان’ ۾ بهترين اداڪاري لاءِ ڏنو ويو.هندستاني ميڊيا موجب، پهرين آگسٽ تي هندستان جي 71 هين نيشنل فلم ايوارڊز جي فاتحن جو اعلان ڪيو ويو، جنهن ۾ شاهه رخ خان ۽ وڪرانت ميسي کي گڏيل طور تي بهترين اداڪار جي ايوارڊ جو فاتح قرار ڏنو ويو.شاهه رخ خان کي وڪرانت ميسي سان گڏ گڏيل طور تي بهترين اداڪار جي ايوارڊ جو فاتح قرار ڏنو ويو، جنهن 2023 ۾ رليز ٿيل فلم ’12 هين فيل’ ۾ جاندار پرفارمنس ڏني.ان کان علاوه، راني مکرجي کي فلم ‘مسز چٽرجي ورسز ناروي’ ۾ شاندار اداڪاري لاءِ بهترين اداڪاري جو قومي ايوارڊ مليو.شاهه رخ خان پنهنجو پهريون نيشنل ايوارڊ کٽڻ کان پوءِ سوشل ميڊيا تي هڪ پيغام پڻ جاري ڪيو.
