عيد تي ٽرانسپورٽ مافيا طرفان هٿ ٺوڪين ڀاڙن جي وصولي جاري، اباڻي علائقن ڏانهن ويندڙ مسافر رُلي ويا
راولپنڊي: عيدالفطر جي موقعي تي هميشه جيان هن ڀيري به ٽرانسپورٽ مافيا هٿ ٺوڪيا ڀاڙا وصول ڪري رهي آهي، جنهن جي ڪري اباڻي علائقن ڏانهن ويندڙ شهري پريشان ٿي ويا آهن.
رپورٽ موجب راولپنڊي مان شهرين جي عيدالفطر جي لاءِ پنهنجن اباڻن علائقن ڏانهن واپسي جو سلسلو جاري آهي، جڏهن ته بس اڏن تي هٿ ٺوڪيا ڀاڙا وصول ڪرڻ سبب شهري پريشان آهن.
ٽرانسپورٽرز طرفان هڪ هڪ سيٽ جون 20 کان وڌيڪ ٽڪيٽون جاري ٿيڻ سبب به مسافرن کي پريشاني کي منهن ڏيڻو پئجي رهيو آهي شهرين جو چوڻ آهي ته اسان ڪالهه کان ٽڪيٽن جي لاءِ ويٺل آهيون ڪوبه اسان کي گاڏي ۾ ويهارڻ لاءِ تيار ناهي، اضافي ڀاڙا وصول ڪري به خوار ڪيو پيو وڃي.
مسافرن ٻڌايو ته هتي انتظاميه يا پوليس جو ڪوبه اهلڪار موجود ناهي جيڪو ٽرانسپورٽر جي خلاف ايڪشن کڻي، وڌيڪ بڪنگ ۽ گاڏين جي کوٽ سبب عورتن ۽ ٻارن کي به پريشانين کي منهن ڏيڻو پئجي رهيو آهي جڏهن ته ٽرانسپورٽرز اوور لوڊنگ سان گڏوگڏ مسافرن جو سامان به اضافي چارجز تي گاڏين ۾ رکي رهيا آهن.
ٻئي پاسي ٽرانسپورٽرز وڌيڪ ڀاڙو وصول ڪرڻ جي شڪايت کي رد ڪندي چيو آهي ته مسافر وڌيڪ هجن ته ٽرانسپورٽ جي کوٽ پيدا ٿيندي آهي، هڪ ئي وقت ۾ وڏي انگ ۾ ماڻهو پنهنجن علائقن ڏانهن وڃي رهيا آهن، اضافي گاڏيون هلائي مسافرن کي اباڻي علائقن طرف کڻي وڃي رهيا آهيون.
هن چيو ته راولپنڊي، اسلام آباد ڏانهن ويندڙ گهڻا مسافر آهن پر واپسي ۾ ڪوبه مسافر نٿو ملي خالي اچڻو پوندو آهي اسان کي بس ڊرائيور ۽ عملي جي خرچن کي به پورو ڪرڻو پوندو آهي. صرف 20 سيڪڙو ڀاڙن ۾ اضافو ڪيو ته جيئن اضافي خرچ ڪڍي سگهون.
ٻئي طرف پنجاب جي وزيراعليٰ مريم نواز عيد تي مقرر ٿيل ڀاڙن کان وڌيڪ ڀاڙو وصول ڪرڻ تي ڪريڪ ڊاون جو حڪم ڏيندي وڌيڪ ڀاڙو وصول ڪرڻ تي سخت قانوني ڪارروائي جي هدايت جاري ڪري ڇڏي آهي. هن وڌيڪ ڀاڙو وصولي روڪڻ جي لاءِ سخت نگراني سان گڏ بس اڏن تي ڀاڙي جون لسٽون لڳائڻ جي به هدايت ڪري ڇڏي آهي.