سنڌ جي مفادن خلاف ڪوبه منصوبو نٿو بڻجي سگهي، اسان وٽ وفاقي حڪومت ڪيرائڻ جي طاقت آهي: وڏو وزير

ڪراچي: سنڌ جي وڏي وزير سيد مراد علي شاهه چيو آهي ته ڪالاباغ ڊيم جي باري ۾ به ماڻهو چوندا هئا ته بڻجي رهيو آهي، هاڻ ساڳئي صورتحال چولستان ڪينال تي ڪئي پئي وڃي، اسان وٽ وفاقي حڪومت کي ڪيرائڻ جيتري طاقت آهي.

ڪراچي جي سينئر صحافين سان ملاقات دوران غير رسمي ڳالهيون ڪندي  هن چيو ته هن وقت ملڪ ۾ سڀني کان اهم پاڻي جو معاملو آهي، انڊر ريور سسٽم پاڻي جي کوٽ جو مڪمل رڪارڊ اسان وٽ موجود آهي، نگران حڪومت ۾ واپڊا اسٽڊي ڪندي آهي، اها عجيب قسم جي اسٽڊي آهي، ديامير ڀاشا ڊيم بنجڻ کان پوءِ 6 ملين ايڪڙ پاڻي ملندو.  نگران حڪومت به انهي ڳالهه تي اعتراض ڪيو

سنڌ جي وڏي وزير چيو ته ڪجهه ڏينهن کان پوءِ پنجاب حڪومت  هڪ ڪينال ڪڍڻ جي تجويز ڏئي ٿي، چناب درياءَ مان پاڻي کنداسين، چولستان ڪينال ٺاهڻ جو چيو جنهن تي اسان کي اعتراض آهي، هن چيو ته جيڪڏهن 27 ايم ايف پاڻي ڊيٽا ۾ وڃي رهيو آهي ته اسان جي ڊيلٽا سربسز هجڻ گهرجي. ايڪنڪ ۾ 6 ڪينالن جو پروجيڪٽ آندو ويو، جنهن  ۾ به اسان اعتراض ڪيو. ارسا جي انهي منصوبي تي اسان سي سي آءِ ۾ به مخالفت ڪنداسين.

سنڌ جي وڏي وزير چيو ته صدر آصف علي زرداري کي چيو ويو  هو ته اضافي زمينون آٻاد ڪرڻ چاهيون ٿا جنهن تي صدر کين چيو ته جيڪڏهن  صوبن کي اعتراض ناهي ته ڀلي ڪريو، انهي اجلاس جا منٽس به غلط ٺاهيا ويا، انهي جو اهو مطلب هرگز ناهي ته هڪ اجلاس کان پوءِ اوهان ڪينال ٺاهي سگهو ٿا. ارسا پاڻي جو سرٽيفڪيٽ ئي غلط ڏنو آهي،  هڪ ته پاڻي درياءَ ۾ ئي ناهي، پنجاب حڪومت موجب پنهنجي حصي جو پاڻي چولستان ۾ شامل ڪيو ويندو، پنجاب جي اهڙن هارين ۽ چيف انجنيئر کان به پڇاڻو ڪيو ويو آهي.

وڏي وزير وڌيڪ چيو ته اسان سنڌ اسيمبلي ۾ ڪينالن خلاف قرارداد منظور ڪئي، اهو معاملو ايڪنڪ ۾ موجود آهي، اسان اتي به سخت مذمت ۽ مخالفت ڪنداسين، اهو معاملو اسان جي ڪنٽرول ۾ آهي، اسان ڪينال ٺهڻ نه ڏينداسين، اسان وٽ پاڪستان پيپلز پارٽي هڪ طاقت آهي اسان انهي جو استعمال ڪنداسين، پروپيگنڊا ذريعي ماڻهن کي ٻڌايو ويو آهي ته سنڌ حڪومت ملوث آهي