ممبئي: بالي ووڊ اداڪار عمران هاشمي سينئر پاڪستاني اداڪار جاويد شيخ جي هن بابت بيان کي سمجهه کان ٻاهر قرار ڏئي ڇڏيو.
هڪ انٽرويوءَ ۾ جاويد شيخ انڪشاف ڪيو هو ته بلاڪ بسٽر بالي ووڊ فلم ”جنت“ جي شوٽنگ دوران عمران هاشمي سان سندس ملاقات ٿي، پر ڀارتي ادڪار سندس سلام جو جواب نه ڏنو، جنهن تي کيس مايوسي ٿي.
جاويد شيخ جو چوڻ هو ته ان واقعي کانپوءِ ٻن هفتن تائين عمران هاشمي جي ساڻس ڳالهه ٻولهه نه ٿي ۽ ٻئي هڪٻئي کان پري رهيا.
جاويد شيخ موجب، جڏهن هدايتڪار کيس عمران هاشمي سان ڊائيلاگ جي مشق ڪرڻ لاءِ چيو ته هن جواب ڏنو ته هو پاڻ نه ويندو، جيڪڏهن ضروري آهي ته عمران هاشمي مون وٽ اچي.
پنهنجي 46هين سالگرهه تي ڀارتي ميڊيا سان ڳالهائيندي عمران خان هاشمي جاويد شيخ جي بيان تي ردعمل ڏيندي چيو ته ” مون کي هن سان پهرين ملاقات بابت ڪجهه چٽو ياد نه آهي، پر مون کي ياد آهي ته منهنجا جاويد سان سدائين خوشگوار لاڳاپا رهيا.“
عمران هاشمي جو چوڻ هو ته ” سندس بيان عجيب آهي، ان وقت منهنجي عمر 20 سال هئي ۽ هو مون کان عمر ۾ وڏو هو تنهنڪري ڪڏهن دوست نه بڻجي سگهياسين.“
هن وڌيڪ چيو ته ” جاويد شيخ جيڪو ڪجهه چئي رهيو آهي ان حوالي سان مون کي ڪجهه ياد ناهي، مان نه ٿو ڄاڻان ته جاويد شيخ ڪهڙيون يادون ساڻ کڻي ويو آهي.“