دنيا ۾ هونئن ته نانگن جا ڪيترائي قسم آهن پر پائي ٿن ۽ ايناڪونڊا کي دنيا جو سڀ کان وڏو نانگ سمجهيو ويندو آهي.
اهو موضون جانورن ۾ دلچسپي رکندڙن ۾ اڪثر بحث هيٺ ايندو آهي ته ڪهڙو نانگ دنيا ۾ سڀ کان وڏو آهي.
پائي ٿن ۽ ايناڪونڊا کانسواءِ ٽائٽانوبوا نالي نانگ به دنيا جي وڏن نانگن مان هڪ آهي، جنهن جي نالي کان گهٽ ماڻهو ئي واقف آهن.
سمٿسونين نيشنل زو اينڊ ڪنزرويشن بائيولاجي انسٽيٽيوٽ موجب گرين ايناڪونڊا هن وقت زمين تي نانگن جو سڀ کان ڳرو نسل آهي، ان نسل جي ڪجهه نانگن جو وزن 250 ڪلو گرام تائين آهي.
سڀ کان وڏي گرين ايناڪونڊا جو ڪو سرڪاري رڪارڊ موجود ناهي پر 2016 ۾ برازيل ۾ تعميراتي ڪارڪنن هڪ نانگ ڏٺو، جيڪو 10 ميٽر ڊگهو هو.
هوڏانهن سڀ کان وڏن نانگن ۾ شمار ٿيندڙ ٽائٽانوبوا جو اڄ دنيا ۾ وجود ناهي، ڇو ته اهو نانگ ختم ٿي ويو آهي، ان جي ڊيگهه 13 ميٽر (تقريبن 42 فوٽ) هئي ۽ ان کي ڏکڻ آمريڪا جي ٻيلن ۽ درياهن ۾ ڏٺو ويو هو.
