ڪراچي : طبي ماهرن رمضان المبارڪ دوران شگر، بلڊ پريشر ۽ دل جي مريضن کي سحري ۽ افطاري ۾ کاڌي پيتي جي حوالي سان اهم مشورو ڏنو آهي.
طبي ماهرن مشورو ڏنو آهي ته سحري ۽ افطاري ۾ متوازن غذائن جو استعمال يقيني بڻايو وڃي، جڏهن ته شگر، بلڊ پريشر ۽ دل جا مريض روزو رکڻ کان اڳ پنهنجي ڊاڪٽر سان لازمي رابطو ڪن.
رمضان المبارڪ ۾ سحري ۽ افطاري ۾ غير متوازن غذائن جو استعمال انساني صحت کي سخت متاثر ڪرڻ جو سبب بڻجي ٿو، شگر ۽ دل جا مريض عام طور تي ان پهلو کي نظرانداز ڪري ڇڏيندا آهن.
وڌيڪ لوڻ واريون ۽ تيل سان تيار ڪيل شيون استعمال ڪرڻ سان انهن مرضن ۾ ورتل ماڻهن لاءِ ڏکيائيون پيدا ٿين ٿيون.
طبي ماهرن موجب شگر، بلڊ پريشر ۽ دل جي مرضن ۾ مبتلا ماڻهو رمضان کان اڳ نه رڳو پنهنجي ڊاڪٽر سان رابطو ڪن پر احتياط ڪندي دوائن جي شيڊيول ۽ متوازن غذا جي استعمال تي لازمي طور ڌيان ڏين.
