نئين دهلي : ڀارتي رياست بهار جي شهر سمستي پور ۾ ريلوي اسٽيشن تي ٻن ڀولن ۾ ويڙهه سڄو ريلوي نظام درهم برهم ڪري ڇڏيو.
ڀارتي ميڊيا موجب ٻن ڀولن ۾ هڪ ڪيلي تي ريلوي اسٽيشن جي پليٽ فارم نمبر 4 ڀرسان جهيڙو ٿيو، هڪ ڀولي ڪا شئي کڻي ٻئي ڀولي کي هڻڻ جي ڪوشش ڪئي، جيڪا ريلوي نظام هلائيندڙ تار کي وڃي لڳي.
ايسٽ سينٽرل ريلوي جي چيف پبلڪ رليشن آفيسر شرسوتي چندرا ٻڌايو ته تار ۾ شارٽ سرڪٽ سبب باهه لڳي ۽ سڄو نظام ٺپ ٿي ويو.
هن ٻڌايو ته واقعي سان ٽرين سروس ۾ خلل پيو ۽ مسافرن سخت پريشاني جو منهن ڏٺو، بجلي جي اوچتو بندش سان ٽرينن کي عارضي طور روڪڻو پيو.
اسٽيشن تي موجود عهديدارن ٻڌايو ته واقعي ۾ ڪنهن مسافر کي ڪو نقصان نه پهتو ۽ مسئلو حل ڪري نظام کي بحال ڪيو ويو.
