لاهور: مسلم ليگ ن جي صدر شهباز شريف چيو آهي ته مون جيل ڪاٽيو، نيب جي سزا ۾ ويس، جيڪڏهن اسٽيبلشمينٽ جي ويجهو هجي ها ته ائين نه ٿئي ها.لاهور ۾ ميڊيا سان ڳالهائيندي شهباز شريف چيو ته چونڊن ۾ عوام کي فيصلو ڪرڻو آهي ته هو ڪنهن کي ووٽ ڏين، سندن ترجيحات ڪهڙيون آهن. هن چيو ته ملڪ کي معاشي ۽ ٻاهرين سطح تي چئلينجز کي منهن ڏيڻو پئجي رهيو آهي، پاڪستان جنهن مقصد لاءِ وجود ۾ آيو هو اهو مقصد اڃا تائين پورو نه ٿي سگهيو آهي، شڪست قبول نه ڪرڻ جو عزم رکندڙ قومن کي ڪير به شڪست نٿو ڏئي سگهي.شهباز شريف جو چوڻ آهي ته ماضي مان سبق سکي اڳتي وڌڻو آهي، 8 فيبروري جي اليڪشن معاشي ۽ سماجي نقطه نظر کان اهم آهي.2018ع ۾ آر ٽي ايس هڪ سوچيل سمجهيل منصوبي تحت جوڙيو ويو، 2018ع کان اڳ پاڪستان تيزيءَ سان ترقي جي راهه تي گامزن هو.اڳوڻي وزيراعظم چيو ته آر ٽي ايس بيهڻ باوجود اسان کٽيو، پولنگ ايجنٽ کي رات جو ٻاهر ڪڍيو ويو ۽ روڪيو ويو، ووٽرن جي اميدن تي پورو لهڻ ئي ووٽ کي عزت ڏيڻ جو رستو آهي.سندس چوڻ آهي ته ملڪ جي ترقي ۾ پبلڪ ٽرانسپورٽ جو اهم ڪردار آهي، اسان 2008 ۾ لاهور ۾ ميٽرو سروس هلائي. 2013 ۾ لاهور ۾ اورنج لائين ٽرين هلڻ کانپوءِ اسان جي خاندان تمام مشڪلاتن کي حوصلي ۽ صبر سان منهن ڏنو.مسلم ليگ ن جي صدر وڌيڪ چيو ته نواز شريف 40 سالن جي سياست ۾ ڪيترائي اُٿل پٿل ڏٺا آهن، جيڪڏهن پاڪستان ڏيوالي جو شڪار هجي ها ته اڄ اسان کي بدترين مشڪلاتون درپيش هجن ها، جڏهن اسان حڪومت سنڀالي ته پاڪستان ڏيوالو ٿيڻ جي ويجهو هو. گذريل حڪومت آءِ ايم ايف سان معاهدو ڪيو ۽ پوءِ ان کي رد ڪري، اسان حڪومت سنڀالي ۽ ملڪ کي ديوالي ٿيڻ کان بچايو.هن اهو به چيو ته پي ٽي ايم ۾ وڃڻ سان مسلم ليگ ن جي مقبوليت ۾ گهٽتائي نه آئي، پاڪستان کي ديوال کان بچائڻ لاءِ جيڪا جنگ وڙهي هئي ان جي مقبوليت گهٽ ٿي، اسان جي مقبوليت ٻيهر وڌي رهي آهي، عوام کي خبر آهي ته رڳو مسلم ليگ ئي مسئلا حل ڪري سگهي ٿي.
