اسلام آباد: چيف جسٽس قاضي فائز عيسيٰ جي سربراهي ۾ سپريم جوڊيشل ڪائونسل سپريم ڪورٽ جي استعيفيٰ ڏيندڙ جج مظهر علي اڪبر نقوي جي خلاف شڪايتن تي ٻڌڻي چونڊن تائين ملتوي ڪري ڇڏي.سپريم جڊيشل ڪائونسل جي پڌرائي واري اجلاس ۾ جسٽس سردار طارق، جسٽس منصور علي شاهه، چيف جسٽس لاهور هاءِ ڪورٽ جسٽس امير ڀٽي ۽ بلوچستان هاءِ ڪورٽ جي چيف جسٽس نعيم اختر افغان شرڪت ڪئي. اجلاس دوران بلوچستان هاءِ ڪورٽ جي چيف جسٽس سيڪريٽري ڪائونسل جزيلا اسلم کي هدايت ڪئي ته هو خواجا حارث کي مليل خط پڙهي ٻڌائن، جنهن تي سيڪريٽري ڪائونسل چيو ته خواجا حارث جي معاون وڪيل ڊاڪٽر ياسر خط جمع ڪرايو آهي. خط ۾ چيو ويو آهي ته هو 11:30 تي پهچي نٿو سگهي. خط ۾ خواجا حارث چيو ته ڪائونسل رڳو حاضر سروس جج خلاف ڪارروائي ڪري سگهي ٿي. ملاقات دوران اٽارني جنرل موقف اختيار ڪيو ته کيس وفاقي حڪومت طرفان عافيه شهربانوڪيس جي فيصلي خلاف اپيل داخل ڪرڻ جي هدايت ڪئي وئي آهي. عافيه شهربانو ڪيس جو فيصلو ڪالهه عدالت ۾ ٻڌايو ويو. اٽارني جنرل موجب وفاقي حڪومت فيصلو ڪيو آهي ته عافيه شهربانو فيصلي خلاف اپيل داخل ڪري رهي آهي. ڪو به اعتراض ناهي ته ڪائونسل اڄ ڪارروائي ملتوي ڪري. جنهن تي چيف جسٽس آف پاڪستان چيو ته پوءِ اهو ئي ڪريون ٿا ۽ ڪائونسل جي ڪارروائي چونڊن تائين ملتوي ڪري ڇڏي. بعد ۾ سپريم جڊيشل ڪائونسل ڪيس جي ڪارروائي 15 فيبروري تي ساڍي 11 وڳي تائين ملتوي ڪري ڇڏي.
