اسلام آباد : وفاقي ڪابينا ايندڙ مالي سال جي بجيٽ ۾ سرڪاري ملازمن جي پگهارن ۾ 7 سيڪڙو واڌ جي منظوري ڏئي ڇڏي آهي.
وزيراعظم شهباز شريف جي صدارت هيٺ وفاقي ڪابينا جو اجلاس پارليامينٽ هائوس ۾ ٿيو، جنهن دوران ڪابينا ايندڙ مالي سال جي بجيٽ دستاويزن ۽ فنانس بل جي مسودي جي منظوري ڏني.
وفاقي ڪابينا جي اجلاس دوران سرڪاري ملازمن جي پگهارن ۾ 7 سيڪڙو واڌ جي به منظوري ڏني وئي.
ذريعن موجب سرڪاري ملازمن جي پگهارن ۾ ٻن مرحلن ۾ واڌ ٿيندي، گريڊ هڪ کان 16 تائين جي ملازمن جي پگهارن ۾ وڌيڪ واڌ ٿيندي.
وفاقي ڪابينا جي اجلاس کي خطاب ڪندي وزيراعظم چيو ته اڄ اسان پنهنجي حڪومت جو ٽيون بجيٽ پيش ڪرڻ وارا آهيون. اميد آهي ته ٽيون بجيٽ اسان جي معيشت کي وڌيڪ تيزي سان اڳتي وڌائيندو. سڀني معاشي چئلينجن جي باوجود، اسان هڪ بهتر بجيٽ پيش ڪرڻ جي ڪوشش ڪئي. مان انهن ماڻهن جو شڪريو ادا ڪريان ٿو جن وڏي صبر سان مهانگائي برداشت ڪئي آهي.
وزيراعظم چيو ته افراط زر 38 سيڪڙو کان گهٽجي سنگل ڊجيٽ تي اچي ويو آهي، پر خليج جي صورتحال جي ڪري ان ۾ ٿورو اضافو ٿيو آهي. سڀني چئلينجن جي باوجود، اڄ اسان جي معيشت بهتر ٿي رهي آهي.
وزيراعظم شهباز شريف چيو ته هن بجيٽ جي تياري ۾ ڪيترائي چئلينج هئا، اسان عام ماڻهو جي مشڪلاتن کان چڱي طرح واقف آهيون.
وزيراعظم شهباز شريف چيو ته اسان کي شمسي، هوائي ۽ بيٽري اسٽوريج جهڙن توانائي جي ذريعن تي ڌيان ڏيڻ جي ضرورت آهي، اسان کي پاڻي جا ذخيرا ۽ ڊيم ٺاهڻا آهن.
تبصرے بند ہیں۔