انقره جي ڀرسان جهاز حادثو، ليبيا جو آرمي چيف ۽ اعليٰ عسڪري اختياريون مارجي ويون

انقره:  ليبيا جي وزيراعظم عبدالحميد دبيبه تصديق ڪئي آهي ته ترڪيه جي راڄڌاني انقره جي ڀرسان جهاز حادثي ۾ ليبيا جو آرمي چيف آف اسٽاف ليفٽيننٽ جنرل محمد علي الحداد سميت ڪيتريون ئي اعليٰ عسڪري اختياريون فوت ٿي ويون آهن.

وزيراعظم عبدالحميد دبيبه سوشل ميڊيا پليٽ فارم ايڪس تي جاري ڪيل بيان ۾ چيو ته  اسان کي اها افسوسناڪ خبر انتهائي ڏک ۽ صدمي سان ملي آهي. هن تصديق ڪئي ته حادثي ۾ آرمي چيف محمد علي الحداد ۽ انهي جي وفد جا ميمبر فوت ٿي ويا آهن.

وزيراعظم موجب فوت ٿي ويلن ۾ بحري فوج جو چيف آف اسٽاف ملٽري مينو فيڪچرنگ اٿارٽي جو سربراهه، آرمي چيف جو صلاحڪار ۽ ميڊيا آفيس جو فوٽو گرافر به شامل آهن. عبدالحميد دبيبه ٻڌايو ته اهو حادثو ترڪيه جي سرڪاري دوري کان پوءِ واپسي جي دوران پيش آيو، پر انهي حادثي جا وڌيڪ تفصيل فراهم ناهن ڪيا ويا.

هن انهي واقعي کي ملڪ ۽ هٿياربند فوج جي لاءِ هڪ وڏو نقصان قرار ڏيندي چيو ته  ليبيا اهڙا ماڻهو وڃائي ڇڏيا آهن جن خلوص، نظم، ضبط ۽ قومي  جذبي سان ملڪ جي خدمت ڪئي. وزيراعظم فوت ٿي ويل ماڻهن جي گهر ڀاتين، فوجي ساٿين ۽ ليبيا جي عوام سان تعزيت جو اظهار ڪيو.

ٻئي طرف ترڪيه جي گهرو وزير علي برليڪايا ٻڌايو ته ليبيا وڌندڙ نجي جهاز جنهن ۾ ليبيا جو آرمي چيف سوار هو. انقره جي ضلعي حايمانا ۾ ڪري تباهه ٿي ويو آهي ۽ انهي جو ملبو به ملي ويو آهي.

ترڪيه جي گهرو وزير موجب فالڪن 50 جو بزنس جيٽ، جنهن جو ٽيل نمبر 9H-DF-J انقره جي ايسن بوغا ايئرپورٽ تان مقامي وقت موجب رات 8 لڳي 10 منٽن تي طرابلس جي لاءِ روانو ٿيو. اڏام جي تقريبن 42 منٽن کان پوءِ رات جو 8 لڳي 52 منٽن تي جهاز جو ڪنٽرول ٽاور سان رابطو ڪاٽا ٿي ويو.

علي برليڪايا ٻڌايو ته جهاز انقره جي ڏکڻ ۾ واقع حايمانا جي ڀرسان ايمرجنسي لينڊنگ جو سگنل اماڻيو هو پر شروعاتي ايمرجنسي سگنل کان پوءِ جهاز سان وڌيڪ ڪوبه رابطو قائم نه ٿي سگهيو.

ترڪ اختيارين موجب جهاز ۾ گڏيل طور تي پنج  ماڻهو سوار هئا جن ۾ ليبيا جو آرمي چيف محمد علي الحداد به شامل هو. ترڪ خابرو اداري موجب انقره جي فضائي حدن ۾ هڪ نجي جهاز سان ريڊيو رابطو ڪاٽا ٿي ويو جنهن جي باري ۾ خيال ڪيو پيو وڃي ته انهي ۾ ليبيا جو آرمي چيف موجود آهي. فلائٽ ٽريڪنگ ڊيٽا موجب احتياطي تدبيرن جي طور تي ايسن بوغا ايئرپورٽ تي ڪيترين ئي اڏامن جو رخ به موڙيو ويو.

انهي کان اڳ ترڪيه جي دفاع واري وزارت اعلان ڪيو هو ته ليبيا جو چيف آف اسٽاف سرڪاري دوري تي انقره ۾ موجود هو جتي هن پنهنجي ترڪ هم منصب ۽ ٻين اعليٰ عسڪري اختيارين سان ملاقاتون ڪيون. اهو دورو ٻنهي ملڪن جي وچ ۾ جاري عسڪري ۽ سيڪيورٽي تعاون جو حصو هو.