واشنگٽن(م ڊ) وائيٽ هائوس آمريڪي صدر ڊونلڊ ٽرمپ جي صدر ٿيڻ کانپوءِ پهريون ڀيرو معائني جي نتيجن جي حوالي سان بيان جاري ڪري ڇڏيو. ڪجهه ڏينهن اڳ آمريڪي صدر جي سالياني ذهني ۽ جسماني طبي معائنو ڪيو ويو هو. طبي معائني کانپوءِ ٽرمپ جو چوڻ هو ته جسماني ٽيسٽ سان گڏوگڏ ذهني ٽيسٽ به سٺي رهي آهي، منهنجي دل ۽ دماغ سٺي حالت ۾ آهي. ٽرمپ جو چوڻ هو ته مجموعي طور تي آئون پاڻ کي سٺي صحت ۾ محسوس ڪيو، آئون سوچيو ته بائيڊن کان مختلف هجڻ گهرجي، ان لاءِ ذهني معائنو به ڪرايو ۽ سمورا جواب صحيح ڏنا. وائيٽ هائوس طرفان جاري بيان ۾ چيو ويو آهي ته ڊاڪٽرن جي رپورٽ موجب ٽرمپ ذهني ۽ جسماني طور تي بهترين صحت ۾ آهي، بطور ڪمانڊر ان چيف ۽ ملڪي سربراهه پنهنجي ذميداريون نڀائڻ جي مڪمل اهل آهي. پرڏيهي خابرو ايجنسي موجب صدر ٽرمپ جي صحت بابت ماضي ۾ سوال اٿندا رهيا آهن، وائيٽ هائوس جو چوڻ آهي ته صدارتي معالج شان باربابيلا تفصيلي جائزو پيش ڪيو آهي ۽ مڪمل رپورٽ به جاري ڪئي ويندي.
