وزيراعليٰ بلوچستان سان مظاهرين جون ڳالهيون ڪامياب، 5 ڏينهن کان جاري ڌرڻو ختم، 11 ڄڻا بازياب

ڪوئٽه:  ڪوئٽه جي علائقي هنه اوڙڪ جي سانحي خلاف ايئرپورٽ روڊ تي گذريل پنج ڏينهن کان جاري احتجاجي ڌرڻو بلوچستان جي وڏي وزير مير سرفراز بگٽي ۽ ڌرڻو هڻندڙ ڪميٽي جي وچ ۾ ڪامياب ڳالهين کان پوءِ ختم ڪيو ويو.

ڌرڻو ختم ٿيڻ سان گڏ ئي شرڪت ڪندڙ احتجاجي ڪيمپ ۽ ٽينٽ هٽائي ڇڏيا جڏهن ته پنج ڏينهن کان بند ايئرپورٽ روڊ هر قسم جي ٽريفڪ لاءِ  بحال ڪيو ويو. بلوچستان جي وڏي وزير مير سرفراز بگٽي ڌرڻو هڻندڙ ڪميٽي، شهيدن جي وارثن ۽ قبائلي اڳواڻن سان ملاقات ڪئي ۽ انهن سان تفصيلي ڳالهيون ڪيون.

ملاقات ۾ صوبائي وزير صحت بخت محمد ڪاڪڙ، سينيٽر منظور احمد ڪاڪڙ، ڪمشنر ڪوئٽه ڊويزن شاهه زيب ڪاڪڙ، اطلاعات بابت خصوص مددگار شاهد رند ۽ ٻيون اعليٰ اختياريون به موجود هيون.  معاون خصوصي شاهد رند موجب ڌرڻو هڻندڙ ڪميٽي سان ڳالهيون ڪامياب رهيون جنهن کان پوءِ وارثن وڏي وزير جي يقين ڏيارڻ تي ڀروسي جو اظهار ڪندي احتجاج ختم ڪرڻ جو اعلان ڪيو.

انهي موقعي تي وزيراعليٰ مير سرفراز بگٽي چيو ته هو پهرين ڏينهن کان ڌرڻو هڻندڙ ڪميٽي سان مسلسل رابطي ۾ هو مسئلي جي پرامن، باوقار ۽ دير تائين حل جي لاءِ هر ممڪن ڪوششون ڪندو رهيو. هن چيو ته متاثر خاندانن ۽ انهن جي بزرگن سان اسان جو پراڻو تعلق احترام ۽ ڀروسي تي ٻڌل آهي، جيڪو آئنده به برقرار رهندو.

وڏي وزير چيو ته جيڪڏهن حڪومت طرفان ڪنهن به سطح تي ڪابه ڪوتاهي يا غلطي ٿي آهي ته انهي کي مڃيندي انهي جو ازالو ڪيو ويندو ۽ متاثر خاندانن کي هر ممڪن داد رسي فراهم ڪئي ويندي. هن ٻڌايو ته بلوچستان ايپيڪس ڪميٽي جي اجلاس ۾ وزيراعظم پاڪستان ۽ فيلڊ مارشل سيد عاصم منير جي موجودگي ۾ اهم فيصلا ڪيا ويا آهن جن تي مڪمل  عملدرآمد يقيني بنايو ويندو.

هن اعلان ڪيو ته  هنه اوڙڪ سانحي جي شهيدن جي وارثن کي مالي معاوضو ڏنو ويندو، گهر ڀاتين کي سرڪاري نوڪريون ڏنيون وينديون، جڏهن ته شهيدن جي ٻارن جي تعليم جا سمورا خرچ بلوچستان جي حڪومت برداشت ڪندي. وڏي وزير انهي ارادي جو به اظهار ڪيو ته حڪومت عوام جي جان، مال جي تحفظ ۽ صوبي ۾ پائيدار امن جي قيام لاءِ هر ممڪن قدم جاري رکندي.

ياد رهي ته 6 جولاءِ تي ڪوئٽه جي ڏوراهين علائقي هنه اوڙڪ، ڪلي ببري ۾ اڻڄاتل هٿياربندن حملو ڪري 5 شهرين کي قتل، 8 ڄڻن کي زخمي جڏهن ته 11 ڄڻن کي اغوا ڪري ورتو هو انهي واقعي جي خلاف وارثن ۽ علائقي جي رهواسين ايئرپورٽ روڊ تي پنج ڏينهن تائين ڌرڻو هنيو هو جنهن سبب شهر جا اهم روڊ بند رهيا ۽ ٽريفڪ جي روانگي متاثر ٿي.

ٻئي طرف صوبائي گهرو وزير مير ضياءُالله لانگو تصديق ڪئي آهي ته حملي جي دوران اغوا ڪيل سمورا 11 ماڻهو بازياب ٿي ويا آهن. گهرو وزير موجب 10 مغوي خميس جي رات بازياب ٿيا جڏهن ته هڪ مغوي هڪ ڏينهن اڳ آزاد ڪيو ويو، سمورن ماڻهن کي حفاظت سان ڪوئٽه منتقل ڪيو ويو آهي.

صوبائي وزير صحت بخت محمد ڪاڪڙ به مغوين جي بازيابي جي تصديق ڪندي ٻڌايو ته بلوچستان جي حڪومت قانون لاڳو ڪندڙ ادارن ۽ قبائلي اڳواڻن جي گڏيل ڪوششن جي نتيجي ۾ سمورن مغوين کي بازياب ڪرائي ورتو آهي.