ٽرمپ جي دوري کان پوءِ چين ايران معاملي کان پوئتي هٽڻ شروع ڪري ڇڏيو آهي: آمريڪي سفير جي دعويٰ

نيويارڪ:  گڏيل قومن ۾ آمريڪي سفير مائيڪل والٽز دعويٰ ڪئي آهي ته صدر ڊونلڊ ٽرمپ جي بيجنگ جي دوري کان پوءِ چين ايران کان پوئتي هٽڻ شروع ڪري ڇڏيو آهي.

گڏيل قومن ۾ خطاب ڪندي مائيڪل والٽز چيو ته چين ايران جي ايٽمي هٿيار نه ٺاهڻ ۽ آبنائي هرمز تي ٽول ٽيڪس نه لڳائڻ تي اتفاق ڪري ورتو آهي. مائيڪل والٽز دعويٰ ڪندي اهو به چيو ته صدر ڊونلڊ ٽرمپ جي بيجنگ جي دوري کان پوءِ چين ايران کان پوئتي هٽڻ شروع ڪري ڇڏيو آهي.

ٻئي طرف گڏيل قومن ۾ چين جي سفير چيو آهي ته آبنائي هرمز بابت سلامتي ڪونسل ۾ آمريڪي قرارداد جو متن ۽ وقت مناسب نه آهي. هن چيو ته هن وقت ٻنهي ڌرين کي سنجيده ۽ نيڪ نيتي تي ٻڌل ڳالهين تي راضي ڪرڻ جي ضرورت آهي. اهڙي صورتحال ۾ قرارداد منظور ڪرڻ مددگار ثابت نه ٿيندي.