واشنگٽن : آمريڪي شهرين ۽ قومي مفادن جي تحفظ لاءِ صدر ڊونلڊ ٽرمپ جي اهم قدمن ۾ ڪيترن ئي ملڪن جي شهرين جي آمريڪا ۾ داخلا تي پابندي شامل هئي. 12 ملڪن تي مڪمل پابنديون لاڳو ڪيون ويون آهن، 7 تي جزوي پابنديون لاڳو ڪيون ويون آهن، ۽ هارورڊ يونيورسٽي ۾ پرڏيهي شاگردن جي ويزا تي به پابندي لڳائي وئي آهي. پرڏيهي خبرون ڏيندڙ اداري موجب آمريڪي صدر ڊونلڊ ٽرمپ هڪ نئين سفري پابندي جي حڪم تي صحيح ڪئي آهي، جنهن ۾ افغانستان، برما، چاڊ، جمهوريه ڪانگو، استوائي گني، اريٽيريا، هيٽي، ايران، لبيا، صوماليا، سوڊان ۽ يمن جي شهرين تي پابندي لڳائي وئي آهي. وائيٽ هائوس جي بيان ۾ چيو ويو آهي ته هن قدم جو مقصد آمريڪي عوام کي خطرناڪ پرڏيهي عنصرن کان بچائڻ آهي. صدر ٽرمپ هڪ وڊيو پيغام ۾ چيو ته ڪولوراڊو ۾ تازو دهشتگرد حملو ان ڳالهه جو ثبوت آهي ته غير ملڪي شهري جن جي صحيح تصديق نه ٿي آهي اهي اسان جي ملڪ لاءِ سنگين خطرو پيدا ڪري سگهن ٿا. آمريڪي صدر هارورڊ يونيورسٽي ۾ پرڏيهي شاگردن لاءِ ويزا تي به پابندي لڳائي ڇڏي آهي.
