ڪراچي : فيڊرل بورڊ آف روينيو (ايف بي آر) ڪراچي بندرگاهه تي هڪ ڪارروائي دوران گڏهن جون چمڙيون وڏي تعداد ۾ ضبط ڪيون آهن.ترجمان موجب، فيڊرل بورڊ آف روينيو پنهنجي اسمگلنگ خلاف ڪارروائي جاري رکي رهيو آهي.انفورسمينٽ ڪليڪٽريٽ ڪراچي ڏکڻ ايشيا پاڪستان بندرگاهه تي هڪ ڪارروائي دوران گڏهن جون چمڙيون ٻاهرين ملڪ سمگل ڪرڻ جي ڪوشش کي ناڪام بڻائي ڇڏيو.گرين چينل ذريعي ڪليئر ڪيل ڪنٽينر ۾ چمڙي جي شين جا 285 پيڪيج مليا، جيڪي چين موڪليا پيا وڃن.عملي پاران ڪنٽينر کي روڪيو ويو ۽ ان جو تفصيلي معائنو ڪيو ويو، جنهن جي نتيجي ۾ ڪنٽينر ۾ ظاهر ڪيل چمڙي جي شين جي آڙ ۾ 14,000 ڪلوگرام ممنوع گڏهن جون چمڙيون هٿ ڪيون ويون، جن جي برآمد پاڪستان حڪومت پنهنجي برآمدي پاليسي تحت منع ڪئي آهي.ترجمان موجب، ضبط ڪيل گڏهن جي چمڙي جو ڪل وزن 14,000 ڪلوگرام آهي، جنهن جي ماليت 80 ملين رپيا آهي.ڪسٽم ايڪٽ جي لاڳاپيل شقن تحت برآمد ڪندڙ خلاف ڪيس داخل ڪيو ويو آهي، ۽ وڌيڪ جاچ جاري آهي.
