واشنگٽن : گڏيل قومن ۾ پاڪستان جي اڳوڻي سفير عاصم افتخار چيو آهي ته فلسطينين کي امداد فراهم ڪرڻ ۾ ناڪامي سلامتي ڪائونسل تي سواليه نشان آهي.پرڏيهي ميڊيا موجب گڏيل قومن ۾ پاڪستان جي مستقل نمائندي عاصم افتخار سلامتي ڪائونسل جي هنگامي اجلاس کي خطاب ڪندي چيو ته فلسطيني عوام کي والاريل فلسطيني علائقن تي اسرائيلي بمباري جي ڪري بک ۽ بي گهر ٿيڻ جي اجتماعي سزا کي منهن ڏيڻو پئجي رهيو آهي.غزه ۾ اجتماعي قبر مان امدادي ڪارڪنن جي 15 لاشن جي دريافت کان پوءِ الجزائر پاران پاڪستان، چين، روس ۽ صوماليا جي سهڪار سان سڏايل اجلاس ۾، عاصم افتخار چيو ته اسان اهڙي اداري جو حصو نٿا ٿي سگهون جيڪو فلسطين جي موجوده صورتحال تي صرف تماشائي بڻيل هجي ۽ ڪجهه به نه ڪري. هن چيو آهي ته اسين اخلاقي ڏيوالپڻي ۽ انسانيت جي خاتمي جو حصو نه بڻجنداسين.پاڪستان جي عهدو ڇڏيندڙ گڏيل قومن جي نمائندي اهو به چيو ته اسرائيل سڀني تهذيبي اصولن جي ڀڃڪڙي ڪري رهيو آهي، جنهن ۾ گڏيل قومن جي سلامتي ڪائونسل جي قراردادون، جنگ بندي جو معاهدو، بين الاقوامي قانون، گڏيل قومن جو چارٽر ۽ جنيوا ڪنوينشن شامل آهن.
