اسلام آباد: وزيراعظم شهباز شريف بجلي جون قيمتون گهٽ ڪرڻ واري تقريب کي خطاب ڪندي چيو آهي ته معاشي استحڪام جي سفر ۾ آرمي چيف جو به ڀرپور تعاون رهيو.
وزيراعظم چيو ته سڀني جو ٿورائتو آهيان ته عيد جي موڪلن کان پوءِ سموري پاڪستان جي نمائندگي ڪرڻ هتي پهتو آهيان، هن چيو ته عيد جي موقعي جي حوالي سان پاڪستان جي معاشي ترقي ۽ استحڪام جي حوالي سان اهم خوشخبري ٻڌائڻ آيو آهيان، هن چيو ته واعدو پورو ٿيو جيڪو مسلم ليگ جي اڳواڻ محمد نوازشريف پنهنجي منشور ۾ انهي جو ارادو ڪيو هو ته الله موقعو ڏنو ته اسان معاشي ميدان ۾ ترقي جون منزلون طئي ڪنداسين.
وزيراعظم شهباز شريف چيو ته ماضي جي حوالي سان ڪجهه گذارشون ڪرڻ چاهيندس ته اسان پر خطر، انتهائي ڏکئي سفر جو مقابلو ڪيئن ڪيو ۽ ڪهڙن ڪهڙن چيلنجز کي منهن ڏنو، جڏهن کان حڪومتي ذميواري سڀالي ته پاڪستان مٿان ڊيفالٽ ٿيڻ جي تلوار لٽڪي رهي هئي، وزيراعظم وڌيڪ چيو ته ڪاروباري ماڻهن سميت پوري قوم ڊنل هئي ته حالتون ڪهڙي طرف وينديون، عدم استحڪام عروج تي هو، آءِ ايم ايف ڳالهائڻ لاءِ تيار نه هو، امپورٽس جي لاءِ ايل جي کولڻ جي لاءِ تمام گهڻي پريشانين کي منهن ڏيڻو پيو هو.
وزيراعظم چيو ته پاڪستان کي ڊيفالٽ جي ڪناري آڻڻ جي لاءِ افراتفري جو شڪار ڪندڙ خوشي وچان مري رهيا هئا، انهن کي يقين هو ته پاڪستان ڪهڙي به حالت ۾ ڊيفالٽ ٿيڻ کان نه بچي سگهندو، وزيراعظم چيو ته انهي ۾ هو سموريون حدون پار ڪري ويا هي اهو ٽولو آهي جنهن آءِ ايم ايف سان ڪيل پنهنجا معاهدا پاڻ ٽوڙيا، انهن کي معطل ڪيو ويو، پاڪستان کي ڊيفالٽ ٿيڻ کان بچاءُ جي ڏينهن لاءِ ڏينهن رات جي ڪوششن ۾ رڪاوٽون پيدا ڪيون ويون.
هن چيو ته دوڪاندار هٿ تي هٿ ڏئي ويٺل هئا ته ڪوبه گراهڪ نٿو اچي، ڪاروباري ماڻهو پنهنجو ڪاروبار بند ڪرڻ تي مجبور هئا، اسان کي وقت تي احساس ٿيڻ گهرجي ته عام ماڻهو جي قربانين کي ڪڏهن به نه وسارڻ گهرجي، قوم جي لاءِ عيد جو تحفو پيش ڪرڻ وڃي رهيو آهيان، پوري قوم جو ٿورو ادا ڪريان ٿو جن مسئلن اسان کي غربت طرف ڌڪيو انهن کي جڙ کان نه ڪٽي اڇليو ته آئنده جو رليف بي معنيٰ بڻجي ويندو.
وزيراعظم پنهنجي خطاب ۾ چيو ته هاڻ اسان 2025 ۾ داخل ٿي ويا آهيون، مهانگائي سنگل ڊيجٽ ۾ اچي وئي آهي، پيٽرول جي قيمتون جن ۾ يقينن منهنجو ۽ اوهان جو عمل دخل نه آهي پوءِ به انهي ۾ 30 روپيه گهٽتائي آئي آهي، هن چيو ته پيٽروليم شين جون قيمتون پاڪستان ۾ اڄ به سڀني کان گهٽ آهن.
وزيراعظم چيو ته جون 2024 ۾ گهريلو صارفين جي لاءِ بجلي جي قيمت 40 روپيه 70 پئسا هئي، اها هاڻ هن وقت 45 روپيه 5 پئسن تي آهي، وزيراعظم چيو ته گهريلو صارفين لاءِ بجلي جي في يونٽ قيمت ۾ 7 روپيه 41 پئسا گهٽتائي ڪري رهيا آهيون، وزيراعظم چيو ته جون 2024ع ۾ صنعتن جي لاءِ بجلي جي قيمت في يونٽ 58 روپيه 50 پئسا هئي بعد ۾ 48 روپيه 19 پئسا ٿي وئي، صنعتي صارفين جي لاءِ بجلي جي في يونٽ قيمت 7 روپيه 50 پئسا گهٽ ڪري رهيو آهيان