نيپيئر: پهريين ون ڊي ميچ ۾ نيوزيلينڊ پاڪستان کي 73 رنسن تان شڪست ڏئي ڇڏي. نيپيئر ۾ کيڏيل ميچ ۾ پاڪستان ٽاس کٽي فيلڊنگ جو فيصلو ڪيو، جيڪو درست ثابت نه ٿيو، ۽ ڪيويز مقرر 50 اوورن ۾ 9 وڪيٽن جي نقصان تي 344 رنسون ٺاهيون. ميزبان ٽيم جو شروعاتي ڪارڪردگي سٺي نه رهي، ۽ پهرين وڪيٽ 8 رنسن تي ڪري پئي، جتي نسيم شاهه صرف 1 رن ٺاهڻ واري وِل ينگ کي پويلين موڪليو. ڊيبيو ڪندڙ عاقف جاويد به پنهنجي شاندار بالنگ جو مظاهرو ڪندي نڪ ڪيلي ۽ هينري نڪلس کي آئوٽ ڪيو. 50 رنسن تي 3 وڪيٽون وڃائڻ کان پوءِ مارڪ چيپمين ۽ ڊيرل مچل 199 رنسن جي شاندار پارٽنرشپ قائم ڪئي. مارڪ چيپمين 132 رنسن جي بهترين اننگز کيڏي، جڏهن ته ڊيرل مچل 76 رنسون ٺاهيون. نيوزيلينڊ طرفان ڊيبيو ڪندڙ محمد عباس 26 بالن تي 52 رنز جي تيز رفتار اننگ کيڏي وڏو اسڪور ڪرڻ ۾ مدد ڏني. نيوزيلينڊ جي ٽيم مقرر 50 اوورن ۾ 9 وڪيٽن تي 344 رنسون ٺاهيون. پاڪستان طرفان عرفان نياز 3، عاقف جاويد ۽ حارث رؤف 2-2، جڏهن ته نسيم شاهه ۽ محمد علي 1-1 رانديگر کي آئوٽ ڪيو. جواب ۾ پاڪستان جو شروعاتي انداز سٺو رهيو، جتي اوپنرن محمد حارث ۽ عثمان خان 83 رنسن جي ڀائيواري قائم ڪئي. 88 رنسن تي ٻنهي اوپنرن جي آئوٽ ٿيڻ کان پوءِ بابراعظم ڪپتان محمد رضوان سان گڏ 76 رنسن جي ڀائيواري قائم ڪئي. محمد رضوان 30 رنسون ٺاهي پويلين موٽيو، پر بابراعظم هڪ طرف کان اننگز کي سنڀالي رکيو ۽ سلمان علي آغا سان گڏ 85 رنسن جي شراڪت جوڙي. بابراعظم جي آئوٽ ٿيڻ کان پوءِ وڪيٽون ڌڙا ڌڙ ڪرڻ جو سلسلو شروع ٿي ويو، وقفي وقفي سان رانديگر آئوٽ ٿيندا ويا، ۽ پوري ٽيم 45هين اوور ۾ 271 رنسن تي ڍير ٿي وئي. بابراعظم 78 رنسون ٺاهي نمايان رهيو، جڏهن ته سلمان علي آغا 58 رنسن جي بهترين اننگز کيڏي. نيوزيلينڊ جي نيٿن اسمٿ 4 وڪيٽون وٺي مٿيون بالر رهيو، جڏهن ته جيڪب ڊفي 2، ۽ وِل اورورڪ، مائيڪل بريس ويل، ۽ محمد عباس 1-1 وڪيٽ حاصل ڪئي.
