اسلام آباد: 2022-23 جا اثاثا ۽ گوشوارن جا تفصيل اليڪشن ڪميشن ۾ جمع نه ڪرائڻ تي 10 اڳوڻن قومي اسيمبلي ميمبرن کي نااهل قرار ڏنو ويو آهي.
اليڪشن ڪميشن 23-2022 ۾ اثاثن جا تفصيل جمع نه ڪرائڻ بابت ڪيس جو فيصلو جاري ڪندي قومي اسيمبلي جي 10 اڳوڻن ميمبرن کي نااهل قرار ڏئي ڇڏيو. فيصلي ۾ سنڌ ۽ بلوچستان اسيمبلين جي 7-7 اڳوڻن ميمبرن کي به نااهل قرار ڏنو ويو آهي.
اليڪشن ڪميشن جي فيصلي ۾ چيو ويو آهي ته اڳوڻا اسيمبلي ميمبر تفصيل جمع نه ڪرائڻ تائين عام، ضمني ۽ سينيٽ چونڊن ۾ حصو نه وٺي سگهندا. مالي سال 23-2022 جي اثاثن جي تفصيلن جا فارم(بي) ڏيڻ تائين اهي ميمبر نااهل رهندا.
اڳوڻن قومي اسيمبلي ميمبرن خرم دستگير خان، محسن نواز رانجها، محمد عادل، رانا محمد اسحاق خان، ڪمال الدين ۽ عصمت الله کي نااهل قرار ڏنو ويو آهي انهي کان علاوه اڳوڻيون ايم اين ايز ثمينه مطلوب، نصيبه، شميم آرا پنهور ۽ روبينه عرفان به نااهل قرار ڏنيون ويون آهن.
اليڪشن ڪميشن گوشوارن جا تفصيل جمع نه ڪرائڻ تي سنڌ اسيمبلي جي اڳوڻي ميمبر عديل احمد، حزب الله ٻگهيو، ارسلان تاج حسين، عارف مصطفيٰ جتوئي، عمران علي شاهه، علي غلام ۽ طاهره کي به نااهل قرار ڏنو ويو آهي. بلوچستان اسيمبلي جي اڳوڻي ميمبر مير سڪندر علي، مير محمد اڪبر، سردار يار رند، عبدالرشيد ۽ عبدالواحد صديقي به نااهل قرار ڏنا ويا آهن. انهي کان علاوه بلوچستان اسيمبلي جي اڳوڻن ميمبرن ۾ حمال ۽ بي بي شاهينه به نااهل قرار ڏنا ويا آهن.