’اسلام آباد معاهدو‘ آخري مرحلن ۾، صحيحون جنيوا ۾ ٿينديون، عراقچي سڀاڻي اسلام آباد ايندو

تهران : سي اين اين سفارتي ذريعن جي حوالي سان رپورٽ ڪيو آهي ته ايران ۽ آمريڪا ۾ عبوري معاهدي جي متن تي گهڻي ڀاڱي اتفاق ٿي ويو آهي. جنهن موجب 60 ڏينهن تائين سڀني محاذن يعني لبنان سميت جنگبندي وڌائي ويندي، هرمز لنگهه کوليو ويندو، آمريڪا ناڪابندي ختم ڪندو، معاهدي جو نالو ’اسلام آباد معاهدو‘ هوندو، صحيحون جنيوا ۾ ٿينديون. آمريڪي نائب صدر جي ڊي وينس ۽ پاڪستان جا نمائندا موجود هوندا. ايران جوهري هٿيار نه ٺاهڻ جي خاطري ڪرائيندو ۽ بعد ۾ سندس ايٽمي پروگرام بابت ڳالهيون ٿينديون. سي اين اين موجب ڊرافٽ کي حتمي شڪل ڏني پئي وڃي. اهو واضح ناهي ته ايران جا ضبط ڪيل اربين ڊالرن مان ڪيتري رقم کيس جاري ٿيندي. ايراني پرڏيهي وزير سڀاڻي ڇنڇر تي اسلام آباد ايندو.

آمريڪا سان معاهدي کي اڃا حتمي شڪل ناهي ڏني، بقائي

ايراني پرڏيهي وزارت جي ترجمان اسماعيل بقائي آمريڪي صدر ڊونلڊ ٽرمپ جي معاهدي بابت دعويٰ تي ردعمل ڏيندي چيو آهي ته اڃا تائين آمريڪا سان ڪنهن به معاهدي کي حتمي شڪل ناهي ڏني وئي.ترجمان اسماعيل بقائي پنهنجي بيان ۾ چيو آهي ته معاهدي تي صحيحن (دستخط) جي تاريخ ۽ جڳهه بابت خبرون رڳو اٽڪل بازيون (قیاس آرایون) آهن، ڳالهين جي متن (مذاڪراتي متن) جو وڏو حصو تيار آهي پر آمريڪا بار بار پنهنجو موقف تبديل ڪندو رهيو آهي. ايراني پرڏيهي وزارت جي ترجمان چيو ته قطر ۽ پاڪستان ثالثي جي عمل ۾ سرگرم ڪردار ادا ڪري رهيا آهن، آمريڪي قدم سفارتي عمل کي متاثر ڪري رهيا آهن ۽ ايران ڳالهين ۾ پنهنجي ريڊ لائنز (مقرر ڪيل حدن) تي ڪو به سمجھوتو نه ڪندو. ان کان اڳ آمريڪي صدر ڊونلڊ ٽرمپ دعويٰ ڪئي هئي ته ايران سان معاهدي جا دستاويز آخري مرحلي ۾ آهن ۽ ايران سان معاهدي تي جلد صحيحون ٿيڻ جو امڪان آهي. ٽرمپ چيو هو ته مان سمجھان ٿو ته ايراني سپريم ليڊر معاهدي تي راضي آهي، مون کي يقين آهي ته ايراني سپريم ليڊر آمريڪا ايران معاهدي جي منظوري ڏئي چڪو آهي ۽ ايران جوهري (ايٽمي) هٿيار نه ٺاهي سگهندو.

ايران سان معاهدو هفتي جي آخر تي ٿي سگهي ٿو، صحيحن جي تقريب يورپ ۾ ٿيڻ جو امڪان

آمريڪي صدر ڊونلڊ ٽرمپ چيو آهي ته ايران سان معاهدي جا دستاويز آخري مرحلي ۾ آهن ۽ معاهدي تي جلد صحيحون (دستخط) ٿيڻ جو امڪان آهي. صدر ٽرمپ صحافين سان ڳالهه ٻولهه ڪندي چيو آهي ته ايران سان معاهدي تي صحيحون هفتي جي آخر ۾ ٿي سگهن ٿيون، جڏهن ته صحيحن جي تقريب يورپ ۾ ٿيڻ جو امڪان آهي. آمريڪي صدر چيو ته آمريڪا ايران معاهدي تي صحيحن واري تقريب ۾ جي ڊي وينس (JD Vance) شريڪ ٿيندو، صحيحون ٿيندي ئي آبنائي هرمز کي کوليو ويندو، سڀ ان تي خوش آهن ۽ سڄو مڊل ايسٽ (مشرقِ وسطيٰ) به ان تي خوش آهي. ٽرمپ چيو ته مان سمجھان ٿو ته ايراني سپريم ليڊر معاهدي تي راضي آهي، مون کي يقين آهي ته ايراني سپريم ليڊر آمريڪا ايران معاهدي جي منظوري ڏئي چڪو آهي ۽ ايران جوهري (ايٽمي) هٿيار نه ٺاهي سگهندو. ان کان علاوه ٽرمپ جو چوڻ هو ته امن معاهدي ۾ پاڪستان بهترين ڪردار ادا ڪري رهيو آهي، پاڪستان جو وزيراعظم ۽ فيلڊ مارشل عظيم شخصيتون آهن. صدر ٽرمپ چيو ته ايران جي معاملي تي اسرائيل سان به ڳالهه ٻولهه ڪئي آهي.

آمريڪي فورسز تجارتي جهازن کي نشانو بڻائڻ جي ڪوشش ڪندڙ 2 ايراني ڊرونز ڪيرائي وڌا: خبرون ڏيندڙ ايجنسي

برطانوي خبرون ڏيندڙ ايجنسي (نيوز ايجنسي) موجب، هڪ آمريڪي اهلڪار ٻڌايو آهي ته آمريڪي فورسز 2 ايراني ڊرونز ڪيرائي وڌا آهن. نيوز ايجنسيءَ جو چوڻ آهي ته آمريڪي اهلڪار موجب، اهي ڊرونز تجارتي جهازن کي نشانو بڻائڻ جي ڪوشش ڪري رهيا هئا. نيوز ايجنسي موجب، آمريڪي اهلڪار اهو پڻ ٻڌايو ته ان واقعي کانپوءِ به آبنائي هرمز (Strait of Hormuz) ۾ هلت چلت (ٽرئفڪ) جاري آهي.